തെലുങ്ക് സിനിമാരംഗത്തെ അതികായരായ രണ്ട് വലിയ കുടുംബങ്ങളാണ് അക്കിനേനി കുടുംബവും നന്ദമൂരി കുടുംബവും. അടുത്തിടെ നടന് നന്ദമൂരി ബാലകൃഷ്ണ അക്കിനേനി നാഗേശ്വര റാവുവിനെതിരായി നടത്തിയ പരാമര്ശം വലിയ വിവാദമാകുകയും. ഇതില് ബാലകൃഷ്ണയ്ക്കെതിരെ അക്കിനേനി കുടുംബത്തിലെ ഇളമുറക്കാരും ആരാധകരും രംഗത്ത് വരികയും ചെയ്തിരുന്നു.
വീര സിംഹ റെഡ്ഡിയുടെ വിജയാഘോഷ വേളയിലാണ് ബാലകൃഷ്ണ തെലുങ്ക് സിനിമയിലെ ഇതിഹാസമായ അക്കിനേനി നാഗേശ്വര റാവുവിനെ അപമാനിച്ച് സംസാരിച്ചത്. ‘എന്റെ അച്ഛന് സീനിയര് എന്ടിആറിന് ചില സമകാലികര് ഉണ്ടായിരുന്നു. ആ രംഗ റാവു, ഈ രംഗ റാവു (എസ്.വി രംഗറാവുവിനെ ഉദ്ദേശിച്ചത്) അക്കിനേനി, തൊക്കിനേനി എന്നൊക്കെ പറഞ്ഞ്’ – എന്നാണ് ബാലയ്യ പറഞ്ഞത്. ഇതാണ് വിവാദമായത്. ബാലയ്യ ആരാധകരില് ചിലര് തന്നെ ഇതിനെതിരെ രംഗത്ത് വന്നു.
വിവാദം കത്തിപടര്ന്നതോടെ സംഭവത്തില് ബാലയ്യ പ്രതികരണവുമായി രംഗത്ത് എത്തുമെന്നാണ് എല്ലാവരും കരുതിയത്. ഒരു ക്ഷമാപണവും നടത്തുമെന്നുമെന്നും ആരാധകര് കരുതി. എന്നാല് നടന്റെ ഭാഗത്തുനിന്ന് അതുണ്ടായില്ല.
‘എഎന്ആര് അദ്ദേഹത്തിന്റെ മക്കളെക്കാള് എന്നെ സ്നേഹിച്ചിരുന്നു. എന്റെ പിതാവ് സീനിയര് എന്ടിആറിന്റെ പേരിലുള്ള അവാര്ഡ് ആദ്യം സമര്പ്പിച്ചത് തന്നെ എഎന്ആറിനാണ്. ഞാന് എന്റെ അമ്മാവനെപ്പോലെയാണ് അദ്ദേഹത്തെ കാണുന്നത്, അദ്ദേഹം എന്റെ ഹൃദയത്തിലാണ്’ – എന്നാണ് ബാലകൃഷ്ണ പറഞ്ഞത്. ഇപ്പോഴിതാ ഇതില് രോഷാകുലരായി രംഗത്ത് വന്നിരിക്കുകയാണ് ആരാധകര്. ഇയാള് പണ്ടേ അഹങ്കാരിയാണെന്നാണ് കൂടുതല് പേരും പ്രതികരിക്കുന്നത്.