അമ്മയുടെ 25-ാം ജനറല് ബോഡി യോഗം കഴിഞ്ഞ ദിവസമാണ് നടന്നത്. ഇത് സംബന്ധമായ പ്രധാന വാര്ത്തകളും താരങ്ങളുടെ ചിത്രങ്ങളും ഏറെ ശ്രദ്ധിക്കപ്പെട്ടിരുന്നു. ആ യോഗത്തിലെ നാദിര്ഷയുടെ ഒരു കലാവിരുത് ആരാധകര്ക്ക് മുന്നില് എത്തിച്ചിരിക്കുകയാണ് നടന് ബാല. വേദിയില് പ്രസംഗിക്കുന്ന മോഹന്ലാലിന്റെ ചിത്രം അതേപടി പകര്ത്തിയാണ് നാദിര്ഷ ബാലയെ ഞെട്ടിച്ചത്. ബാല തന്നെയാണ് ഇക്കാര്യം ഫെയ്സ്ബുക്കിലൂടെ പങ്കുവെച്ചത്.
“എ.എം.എം.എ മീറ്റിംഗ് ഹൈലൈറ്റ്സ്…ലാലേട്ടന് സ്റ്റേജില് സംസാരിക്കുമ്പോള് ഞാന് നാദിര്ഷിക്കായുടെ അടുത്ത് ഇരിക്കുകയായിരുന്നു. പെട്ടെന്ന് നാദിര്ഷിക്ക ഒരു പെന്സില് എടുത്തു വരയ്ക്കാന് തുടങ്ങി. എനിക്കെന്റെ കണ്ണുകളെ വിശ്വസിക്കാന് സാധിച്ചില്ല. കാരണം ഒരു മിനിറ്റ് കൊണ്ടാണ് നാദിര്ഷിക്ക നമ്മുടെ മോഹന്ലാലിനെ വരച്ചത്. ആരാധനയേക്കാള് ഏറെ ഞാന് വലിയൊരു കഴിവാണ് അവിടെ കണ്ടത്. ലാലേട്ടാ ഒരുപാട് സ്നേഹം. എല്ലാവരെയും ദൈവം അനുഗ്രഹിക്കട്ടെ”. ബാല ചിത്രം പങ്കുവെച്ച് കുറിച്ചു.
നാദിര്ഷയുടെ വരയെ പ്രശംസിച്ച് നിരവധി പേരാണ് രംഗത്ത് വന്നത്. 14 വര്ഷത്തോളമായി അഭിനയത്തില് നിന്ന് വിട്ടുനിന്ന നാദിര്ഷ വീണ്ടും നടന്റെ കുപ്പായമണിഞ്ഞിരിക്കുകയാണ്. വ്യാസന് കെ.പി. സംവിധാനത്തില് ദിലീപ് നായകനായെത്തുന്ന ശുഭരാത്രി എന്ന ചിത്രത്തിലൂടെയാണ് അഭിനയ രംഗത്തേക്കുള്ള നാദിര്ഷയുടെ മടങ്ങിവരവ്. ചിത്രം ജൂലൈ ആറിന് തിയേറ്ററുകളിലെത്തും.