ബ്ലോക്ക്ബസ്റ്റര് ചിത്രം ‘പുഷ്പ’യുടെ നിര്മ്മാതാക്കളായ മൈത്രി മൂവി മേക്കേഴ്സ് മലയാളത്തിലേക്ക്. ലാല് ജൂനിയര് ഒരുങ്ങുന്ന ‘നടികര് സംഘം’ എന്ന ചിത്രമാണ് മൈത്രി മൂവി മേക്കേഴ്സിന്റെ നിര്മ്മാണത്തില് ഒരുങ്ങുന്നത്. ഡ്രൈവിംഗ് ലൈസന്സ് എന്ന ബ്ലോക്ക്ബസ്റ്റര് ചിത്രത്തിന് ശേഷം ലാല് ജൂനിയര് സംവിധാനം ചെയുന്ന ചിത്രമാണിത്.
അലന് ആന്റണി, അനൂപ് വേണുഗോപാല് എന്നിവരുടെ നേതൃത്വത്തിലുള്ള ഗോഡ്സ്പീഡിനൊപ്പം ചേര്ന്നാണ് മൈത്രി മൂവി മെക്കേഴ്സിന്റെ വൈ.നവീനും, വൈ.രവി ശങ്കറും നടികര് തിലകം നിര്മിക്കുന്നത്. ടൊവിനോ തോമസും സൗബിന് ഷാഹിറുമാണ് നടികര് തിലകത്തില് കേന്ദ്ര കഥാപാത്രങ്ങളെ അവതരിപ്പിക്കുന്നത്.
ഒരു കൊമേഴ്സ്യല് എന്റര്ടെയ്നര് ആയ ചിത്രത്തിന്റെ തിരക്കഥ ഒരുക്കുന്നത് സുവിന് സോമശേഖരനാണ്. കാണെക്കാണെയുടെ ഛായാഗ്രഹണം നിര്വ്വഹിച്ച ആല്ബിയാണ് നടികര് സംഘത്തിന്റെയും ഛായാഗ്രാഹകന്. രതീഷ് രാജ് ആണ് എഡിറ്റര്. യക്സന് ഗാരി പെരേര, നേഹ എസ് നായര് എന്നിവര് സംഗീത സംവിധാനവും പ്രശാന്ത് മാധവ് കലാസംവിധാനവും നിര്വ്വഹിക്കുന്നു.
നിതിന് മൈക്കിളാണ് ചീഫ് അസോസിയേറ്റ്. വസ്ത്രാലങ്കാരം പ്രവീണ് വര്മ്മ, മേക്കപ്പ് ആര് ജി വയനാട്. അന്ബരിവ് ആണ് സ്റ്റണ്ട് കൈകാര്യം ചെയ്യുന്നത്. ഭൂപതി കൊറിയോഗ്രഫിയും അരുണ് വര്മ്മ സൗണ്ട് ഡിസൈനിങ്ങും കൈകാര്യം ചെയ്യുന്നു. പബ്ലിസിറ്റി ഡിസൈന് ഹെസ്റ്റണ് ലിനോ. സ്റ്റോറീസ് സോഷ്യലിന്റെ ബാനറില് സംഗീത ജനചന്ദ്രനാണ് മാര്ക്കറ്റിംഗ് ആന്ഡ് കമ്മ്യൂണിക്കേഷന് കൈകാര്യം ചെയ്യുന്നത്.