അലക്ഷ്യമായി കാറോടിച്ച നടന് സുരാജ് വെഞ്ഞാറമൂടിനെതിരെ കേസ്. കാര് ഇടിച്ച് ബൈക്ക് യാത്രക്കാരന് പരിക്കേറ്റ സംഭവത്തില് സുരാജിന് കാരണം കാണിക്കല് നോട്ടീസ് നല്കുമെന്നും ഗതാഗത നിയമങ്ങളെ കുറിച്ചുള്ള ക്ലാസില് നടന് പങ്കെടുക്കണമെന്നും മോട്ടോര് വാഹന വകുപ്പ് അറിയിച്ചിട്ടുണ്ട്.
കഴിഞ്ഞ ദിവസമാണ് സുരാജിന്റെ കാറുമായി കൂട്ടിയിടിച്ച് ബൈക്ക് യാത്രക്കാരന് പരിക്കേറ്റത്. തിരുവനന്തപുരത്ത് നിന്ന് വരികയായിരുന്ന സുരാജിന്റെ വാഹനമാണ് പാലാരിവട്ടത്ത് വച്ച് ബൈക്കുമായി കൂട്ടിയിടിച്ച് അപകടത്തില്പ്പെട്ടത്. മലപ്പുറം മഞ്ചേരി സ്വദേശിയായ ശരത്തിനാണ് പരിക്കേറ്റത്.
ഇദ്ദേഹം ആശുപത്രിയില് ചികിത്സയിലാണ്. ശനിയാഴ്ച രാത്രി 12 മണിയോടെയായിരുന്നു സംഭവം. പരിക്കേറ്റ ശരത്തിനൊപ്പം സുരാജും ആശുപത്രിയില് എത്തിയിരുന്നു. ഈ വാര്ത്തകള് വരുന്ന സമയത്ത് ചര്ച്ചയാകുന്നത് സുരാജിന്റെ തന്നെ ‘ഡ്രൈവിംഗ് ലൈസന്സ്’ എന്ന സിനിമയാണ്.
സുരാജ് മോട്ടോര് വെഹിക്കിള് ഇന്സ്പെക്ടറുടെ റോളില് എത്തിയ ഡ്രൈവിംഗ് ലൈസന്സ് എന്ന ചിത്രമാണ് അത്. കുരുവിള ജോസഫ് എന്ന മോട്ടോര് വെഹിക്കിള് ഇന്സ്പെക്ടര് ആയാണ് സുരാജ് ചിത്രത്തില് എത്തിയത്. സച്ചി രചിച്ച് ലാല് ജൂനിയര് സംവിധാനം ചെയ്ത സിനിമ 2019ല് ആയിരുന്നു റിലീസ് ചെയ്തത്.