എം.ടി. വാസുദേവൻ നായരുടെ കഥകൾ കോർത്തിണക്കുന്ന ആന്തോളജി സിനിമാ സീരീസിൽ ‘കടുഗണ്ണാവ ഒരു യാത്രാക്കുറിപ്പ്’ സംവിധായകൻ രഞ്ജിത്ത് സിനിമയാക്കും. മമ്മൂട്ടിയാണ് ചിത്രത്തിൽ നായക കഥാപാത്രത്തെ അവതരിപ്പിക്കുന്നത്.
ഔദ്യോഗിക ആവശ്യത്തിനായി ശ്രീലങ്കയിലേക്ക് പോകേണ്ടിവരുന്ന വേണുഗോപാൽ എന്ന വ്യക്തി തന്റെ പഴയ ഓർമ്മകളെ പൊടിതട്ടിയെടുക്കുകയാണ് ചിത്രത്തിലെ കഥാപശ്ചാത്തലം.
ശ്രീലങ്കയിൽ ജോലി ചെയ്തിരുന്ന അച്ഛന് മറ്റൊരു ബന്ധത്തിലുണ്ടായ മകൾ എന്ന് കരുതപ്പെടുന്ന പെൺകുട്ടിയെക്കുറിച്ചുള്ള ഒരു മുതിർന്ന പത്രപ്രവർത്തകൻറെ ഓർമ്മയാണ് ‘കടുഗണ്ണാവ’ എന്ന ചെറുകഥയിൽ എം.ടി വിവരിക്കുന്നത്.
‘നിന്റെ ഓർമ്മയ്ക്ക്’ എന്ന ചെറുകഥയുടെ തുടർച്ചയെന്ന രീതിൽ എം.ടി. എഴുതിയ ചെറുകഥയാണ് ‘കടുഗണ്ണാവ’. എം.ടിയുടെ ആത്മകഥാംശം ഉളള ചെറുകഥ കൂടിയാണ് കടുഗണ്ണാവ. അതേസമയം, ആഭ്യന്തര കലാപം രൂക്ഷമായ ശ്രീലങ്കയിൽ, സിനിമ ചിത്രീകരിക്കുന്നതുമായി ബന്ധപ്പെട്ട കാര്യത്തിൽ അന്തിമ തീരുമാനം ആയിട്ടില്ല.