തന്റെ കന്നി സംവിധാന സംരംഭം ബറോസ് ജൂണില് ആരംഭിക്കുമെന്ന് നടന് മോഹന്ലാല്. ത്രീഡിയില് ഒരുങ്ങുന്ന ചിത്രത്തിന്റെ ഷൂട്ടിംഗ് ജൂണ് അവസാനം ആരംഭിക്കുമെന്ന് ടൈംസ് ഓഫ് ഇന്ത്യയുമായുള്ള അഭിമുഖത്തിലാണ് നടന് ഇക്കാര്യം വെളിപ്പെടുത്തിയത്.
ഷൂട്ടിംഗ് ജൂണ് അവസാനത്തോടെ ആരംഭിക്കും. ഗോവയിലും കേരളത്തിലുമായിട്ടാണ് പ്രധാനമായും ഷൂട്ടിംഗ് നടത്തുക. ഒരു 3D ചിത്രമായതിനാല് തന്നെ കുറെ ഭാഗങ്ങള് സ്റ്റുഡിയോക്ക് അകത്തും ചിത്രീകരിക്കേണ്ടി വരും.
റിലീസിന് ഒരുങ്ങുന്ന മരക്കാര് അടക്കം നിരവധി പ്രിയദര്ശന് ചിത്രങ്ങളില് അഭിനയിച്ചിട്ടുള്ള മോഹന്ലാലിന് ആ സുഹൃത്തിന്റെ സംവിധാനശൈലി പ്രചോദിപ്പിച്ചിട്ടുണ്ടോ എന്ന ചോദ്യത്തിന് ലാലേട്ടന്റെ മറുപടി ഇങ്ങനെ ആയിരുന്നു.
പ്രിയന്റെ ചിത്രങ്ങളുമായി ബറോസിനെ താരതമ്യം ചെയ്യേണ്ടി വരില്ല. ചിത്രത്തിന്റെ തിരക്കഥ ചര്ച്ച ചെയ്തപ്പോഴെല്ലാം പ്രിയന് കൂടെയുണ്ടായിരുന്നു. പക്ഷേ അദ്ദേഹത്തിന്റെ സംവിധാനത്തിലുള്ള ആ ഒരു മാജിക് എന്റെ സംവിധാനത്തില് കാണുവാന് സാധിക്കില്ല. ബറോസ് ഒരു കുട്ടിയും ഭൂതവും തമ്മിലുള്ള കഥയാണ്. അറിയാതെ കയറി വരുന്ന ചില കാര്യങ്ങള് ഉണ്ടാകാം. പ്രിയന്റെ ഏറ്റവും വലിയ സവിശേഷത അദ്ദേഹം സിനിമക്ക് ആവശ്യമുള്ള ഷോട്ടുകള് മാത്രമേ എടുക്കൂ. മോഹന്ലാല് വ്യക്തമാക്കി.