മോഹന്ലാല്-ലിജോ ജോസ് പെല്ലിശേരി കോംമ്പോയില് ഒരുങ്ങുന്ന ‘മലൈകോട്ടൈ വാലിബന്’ ചിത്രത്തിന്റെ ഷൂട്ടിംഗ് രാജസ്ഥാനില് ആരംഭിച്ചു. രാജസ്ഥാനിലെ ജയ്സാല്മീറില് ആണ് ചിത്രീകരണം നടക്കുന്നത്. ഇന്ന് രാവിലെയാണ് ചിത്രത്തിന്റെ പൂജയും സ്വിച്ച് ഓണ് കര്മവും നടന്നത്.
ചടങ്ങില് മോഹന്ലാല്, ലിജോ ജോസ് പെല്ലിശേരി, മറ്റു താരങ്ങള്, ചിത്രത്തിന്റെ നിര്മ്മാതാക്കളായ ജോണ് ആന്ഡ് മേരി ക്രിയേറ്റിവിന്റെ ഷിബു ബേബി ജോണ്, സെഞ്ച്വറി ഫിലിംസിന്റെ കൊച്ചുമോന്, മാക്സ് ലാബിന്റെ അനൂപ് എന്നിവരും ചടങ്ങില് പങ്കെടുത്തു.
2022 ഡിസംബര് 23നാണ് എല് ജെപി-മോഹന്ലാല് ചിത്രത്തിന്റെ ടൈറ്റില് പ്രഖ്യാപിച്ചത്. ഗുസ്തിക്കാരനായാണ് മോഹന്ലാല് ചിത്രത്തില് വേഷമിടുക. ജോണ് മേരി ക്രിയേറ്റിവ് ലിമിറ്റടിനോടൊപ്പം മാക്സ് ലാബ് സിനിമാസ്, ആമേന് മൂവി മോണ്സ്റ്ററി, സെഞ്ച്വറി ഫിലിംസ് എന്നിവര് ചേര്ന്നാണ് ഈ ചിത്രം നിര്മ്മിക്കുന്നത്.
ആമേന് തിരക്കഥയൊരുക്കിയ പിഎസ് റഫീക്കാണ് മോഹന്ലാല് ചിത്രത്തിനും തിരക്കഥയൊരുക്കുന്നത്. ആമേനിലെ മികച്ച ഗാനങ്ങള് ഒരുക്കിയ പ്രശാന്ത് പിള്ള സംഗീതം നിര്വഹിക്കും. മറാഠി നടി സൊണാലി കുല്ക്കര്ണി, കന്നഡ നടനും കൊമേഡിയനുമായ ഡാനിഷ് സെയ്തും മലൈക്കോട്ടൈ വാലിബന്റെ ഭാഗമാണ്. ഹരീഷ് പേരടിയും അഭിനയിക്കുന്നുണ്ട്.