അനുഷ്ക ഷെട്ടി ചിത്രം ‘മിസ് ഷെട്ടി മിസ്റ്റര് പോളിഷെട്ടി’ ഒ.ടി.ടിയിലേക്ക്. സെപ്റ്റംബര് 7ന് തിയേറ്ററുകളില് എത്തിയ ചിത്രം ഒക്ടോബര് 5ന് നെറ്റ്ഫ്ളിക്സില് സ്ട്രീമിംഗ് ആരംഭിക്കും. ഷാരൂഖ് ഖാന് ചിത്രം ‘ജവാന്റെ’ കുതിപ്പിനിടയിലും മിസ് ഷെട്ടി മികച്ച വിജയം നേടിയിരുന്നു.
12.5 കോടി ബജറ്റില് ഒരുക്കിയ ചിത്രം ബോക്സ് ഓഫീസില് 50 കോടി കളക്ഷന് നേടിയിരുന്നു. ഒരു ഇടവേളയ്ക്ക് ശേഷം അനുഷ്ക ഷെട്ടി വീണ്ടും അഭിനയരംഗത്തേക്ക് തിരിച്ചെത്തിയ ചിത്രമാണിത്. 2020ല് പുറത്തിറങ്ങിയ ‘നിശബ്ദം’ എന്ന ചിത്രത്തിന് ശേഷം എത്തിയ അനുഷ്ക ചിത്രമാണിത്.
നവീന് പോളിഷെട്ടി ആയിരുന്നു നായകനായി എത്തിയത്. മഹേഷ് ബാബുവാണ് ചിത്രം സംവിധാനം ചെയ്തത്. ചിത്രത്തിന്റെ നിര്മാണം യുവി ക്രിയേഷന്സാണ്. ഛായാഗ്രാഹണം നിരവ് ഷായാണ്. സംഗീതം രാധനാണ് നിര്വഹിച്ചത്. അനുഷ്ക ഷെട്ടിക്ക് വീണ്ടും വമ്പന് സിനിമകളിലേക്ക് ഓഫറുകളും ലഭിക്കുന്നതായി റിപ്പോര്ട്ടുണ്ട്.
അതേസമയം, ജയസൂര്യയുടെ ‘കത്തനാര്: ദി വൈല്ഡ് സോര്സറര്’ എന്ന ചിത്രത്തിലാണ് അനുഷ്ക ഇനി അഭിനയിക്കാന് ഒരുങ്ങുന്നത്. അനുഷ്കയുടെ ആദ്യ മലയാള ചിത്രമാണിത്. ഇത് കൂടാതെ ചിരഞ്ജീവിയുടെ പുതിയ ചിത്രത്തിലെ നായികയായി അനുഷ്കയെ പരിഗണിക്കുന്നുണ്ട് എന്നും റിപ്പോര്ട്ടുകളുണ്ട്.