ആരാധകര് വളരെ ആകാംക്ഷയോടെ കാത്തിരിക്കുന്ന ചിത്രമാണ് മോഹന്ലാല്-പ്രിയദര്ശന് കൂട്ടുകെട്ടിന്റെ മരയ്ക്കാര് അറബിക്കടലിന്റെ സിംഹം. ഇപ്പോഴിതാ ആരാധകരുടെ ആവേശം ഇരട്ടിപ്പിച്ച് ചിത്രത്തിന്റെ റിലീസ് തിയതി പ്രഖ്യാപിച്ചിരിക്കുകയാണ്. ചിത്രം അടുത്ത വര്ഷം മാര്ച്ച് 19 ന് തിയേറ്ററുകളിലെത്തും. നടന് മോഹന്ലാലാണ് ഫെയ്സ്ബുക്ക് പേജിലൂടെ റിലീസ് തിയതി പ്രഖ്യാപിച്ചത്.
അടുത്തിടെ ആശീര്വാദ് സിനിമാസിന്റെ ബാനറില് പുറത്തിറങ്ങിയ സിനിമകളുടെ വിജയാഘോഷവും വരാനിരിക്കുന്ന സിനിമകളെക്കുറിച്ചുള്ള നിര്ണായക പ്രഖ്യാപനങ്ങളും നടന്നപ്പോള് മരക്കാര് അറബിക്കടലിന്റെ സിംഹത്തിലെ 60 സെക്കന്ഡ് ദൈര്ഘ്യമുള്ള വീഡിയോയും പുറത്തു വിട്ടിരുന്നു. ഏതാനും വിഷ്വലുകള് കൊണ്ട് തന്നെ മലയാള സിനിമാ ലോകത്തെ അമ്പരപ്പിച്ചിരിക്കുകയാണ് പ്രിയദര്ശന്. മരയ്ക്കാറിന് വി.എഫ്.എക്സ് ഒരുക്കുക മാര്വെല് സിനിമകള്ക്ക് വി.എഫ്.എക്സ് ഒരുക്കിയ അനിബ്രയിന് ആണ്.
ആശിര്വാദ് സിനിമാസിന്റെ ബാനറില് ആന്റണി പെരുമ്പാവൂരാണ് നിര്മ്മാണം. ഡോക്ടര് റോയ്, സന്തോഷ് ടി കുരുവിള എന്നിവര് സഹനിര്മ്മാതാക്കളാണ്. മോഹന്ലാലിന് പുറമെ, പ്രണവ് മോഹന്ലാല്, പ്രഭു, അര്ജുന്, ഫാസില്, സുനില് ഷെട്ടി, മഞ്ജു വാര്യര്, കീര്ത്തി സുരേഷ്, കല്യാണി പ്രിയദര്ശന്, നെടുമുടി വേണു, മുകേഷ്, സിദ്ദിഖ്, രഞ്ജി പണിക്കര്, ഹരീഷ് പേരാടി തുടങ്ങിയ വമ്പന് താരനിരയാണ് ചിത്രത്തിലുള്ളത്.