“മരട് 357″ലെ ആദ്യഗാനം ഏറ്റെടുത്ത് സോഷ്യല് മീഡിയ. റിലീസ് ചെയ്ത് മൂന്നു ദിവസം പിന്നിടുമ്പോള് ആറ് ലക്ഷത്തിലധികം പേരാണ് “”മാനം മീതെ”” എന്ന ഗാനം കണ്ടിരിക്കുന്നത്. മധു വാസുദേവന്റെ വരികള്ക്ക് ഫോര് മ്യൂസിക്ക്സ് ഈണമിട്ട് അന്വര് സാദത്ത്, വിപിന് സേവ്യര്, ബിബി മാത്യു, ഹരിത ബാലകൃഷ്ണന് എന്നിവര് ചേര്ന്നാണ് ഗാനം ആലപിച്ചിരിക്കുന്നത്.
സിനിമയിലെ എല്ലാ താരങ്ങളും ഈ ഗാനത്തില് പ്രത്യക്ഷപ്പെടുന്നുണ്ട്. താരങ്ങളുടെത് തകര്പ്പന് ഡാന്സെന്ന കമന്റുകളുമായും ചിലര് എത്തുന്നുണ്ട്. “പട്ടാഭിരാമന്” എന്ന സൂപ്പര് ഹിറ്റ് സിനിമയ്ക്ക് ശേഷം കണ്ണന് താമരക്കുളം സംവിധാനം ചെയ്യുന്ന ചിത്രമാണ് മരട് 357.
കേരളത്തില് ഏറെ കോളിളക്കം സൃഷ്ടിച്ച മരട് വിഷയത്തിന്റെ കഥയാണ് മരട് 357 പറയുന്നത്. അനൂപ് മേനോന്, ധര്മജന്, മനോജ് കെ ജയന്, ബൈജു സന്തോഷ്, സാജില് സുദര്ശന്, സെന്തില് കൃഷ്ണ എന്നിവര് കേന്ദ്ര കഥാപാത്രങ്ങളെ അവതരിപ്പിക്കുന്ന ചിത്രത്തില് ഷീലു എബ്രഹാം, നൂറിന് ഷെറീഫ് എന്നിവരാണ് നായികമാര്.
സുധീഷ്, ഹരീഷ് കണാരന്, കൈലാഷ്, ശ്രീജിത്ത് രവി, ജയന് ചേര്ത്തല, ജയകൃഷ്ണന്, ബഷീര്, പടന്നയില്, മുഹമ്മദ് ഫൈസല്, കൃഷ്ണ, മനുരാജ്, അനില് പ്രഭാകര്, വിഷ്ണു, കലാഭവന് ഫനീഫ്, ശരണ്, പോള് താടിക്കാരന്, അഞ്ചലി, സരയൂ തുടങ്ങി വന് താരനിര തന്നെ ചിത്രത്തിലുണ്ട്.
അബാം മൂവീസിന്റെ ബാനറില് അബ്രഹാം മാത്യുവും സ്വര്ണ്ണലയ സിനിമാസിന്റെ ബാനറില് സുദര്ശനന് കാഞ്ഞിരക്കുളവും ചേര്ന്നാണ് ചിത്രം നിര്മ്മിക്കുന്നത്. ദിനേശ് പള്ളത്താണ് തിരക്കഥ ഒരുക്കുന്നത്. രവിചന്ദ്രനാണ് ഛായാഗ്രഹണം. എഡിറ്റര് വി.ടി ശ്രീജിത്താണ്.