സ്ത്രീവിരുദ്ധ പരാമര്ശത്തില് നടന് മന്സൂര് അലിഖാന് തിരിച്ചടി. തൃഷ, ഖുശ്ബു, ചിരഞ്ജീവി എന്നിവര്ക്കെതിരെയാണ് മന്സൂര് മാനനഷ്ടക്കേസ് നല്കിയത്. ഒരു കോടി രൂപ നഷ്ടപരിഹാരം തരണമെന്ന മന്സൂറിന്റ പരാതിയില് നേരത്തെ മദ്രാസ് ഹൈക്കോടതി നടനെ ശാസിച്ചിരുന്നു.
മന്സൂറിന്റെ സ്ത്രീവിരുദ്ധ പരാമര്ശത്തില് കേസ് നല്കേണ്ടത് തൃഷയാണെന്ന് കഴിഞ്ഞയാഴ്ച കോടതി അഭിപ്രായപ്പെട്ടിരുന്നു. മന്സൂര് അലി ഖാന് പിഴ ചുമത്തിയാണ് ഇപ്പോള് കേസ് തള്ളിയത്. പ്രശസ്തിക്ക് വേണ്ടിയാണ് മന്സൂര് കേസുമായി കോടതിയെ സമീപിച്ചത് എന്ന് കോടതി വിമര്ശിച്ചു.
എക്സ് പ്ലാറ്റഫോമിലൂടെ തന്നെ അപകീര്ത്തിപ്പെടുത്തിയെന്ന് ആരോപിച്ചാണ് തൃഷക്കെതിരെ മന്സൂര് അലി ഖാന് പരാതി നല്കിയത്. ദേശീയ വനിത കമ്മീഷന് അംഗം ഖുശ്ബു, നടന് ചിരഞ്ജീവി എന്നിവര്ക്കെതിരെയും ചെന്നൈ കോടതിയില് മന്സൂര് കേസ് നല്കിയിരുന്നു.
‘ലിയോ’ സിനിമയുമായി ബന്ധപ്പെട്ടുള്ള അഭിമുഖത്തിനിടെ തൃഷയ്ക്കെതിരെ മന്സൂര് നടത്തിയ സ്ത്രീവിരുദ്ധ പരാമര്ശം വിവാദമായിരുന്നു. എന്നാല് ഒരു സ്ത്രീയെയും അധിക്ഷേപിച്ച് സംസാരിച്ചിട്ടില്ലെന്നും വസ്തുത മനസിലാക്കാതെ മൂവരും തനിക്കെതിരെ അപകീര്ത്തികരമായ പരാമര്ശം നടത്തി എന്നുമാണ് മന്സൂറിന്റെ വാദം.
ചെന്നൈ പൊലീസ് കേസ് എടുത്തതിന് പിന്നാലെ മന്സൂര് മാപ്പ് പറയുകയും, നടനെതിരെ നടപടി വേണ്ടെന്ന് തൃഷ അഭിപ്രായപ്പെടുകയും ചെയ്തിരുന്നു. വിവാദം കേട്ടടങ്ങി എന്ന് കരുതിയിരിക്കവെയാണ് അപ്രതീക്ഷിത നീക്കവുമായി മന്സൂര് അലി ഖാന് രംഗത്തെത്തിയത്.