മമ്മൂട്ടി- വൈശാഖ് കൂട്ടുക്കെട്ടിലൊരുങ്ങുന്ന ഏറ്റവും പുതിയ ചിത്രം ‘ടർബോ’യുടെ ടൈറ്റിൽ പോസ്റ്റർ വന്നതോടുകൂടി ആവേശത്തിലാണ് ആരാധകർ. നൂറ് ദിവസത്തെ ഷൂട്ടിങ്ങാണ് ടർബോയ്ക്ക് ഉള്ളത്. മിഥുൻ മാനുവൽ തോമസാണ് ചിത്രത്തിന് തിരക്കഥയെഴുതുന്നത്. കോയമ്പത്തൂരിൽ ചിത്രത്തിന്റെ ആദ്യ ഷെഡ്യൂൾ ഷൂട്ടിംഗ് ആരംഭിച്ചിട്ടുണ്ട്. അർജുൻ ദാസാണ് ചിത്രത്തിൽ മമ്മൂട്ടിയുടെ വില്ലനായി എത്തുന്നത് എന്ന് സ്ഥിതീകരിക്കാത്ത റിപ്പോർട്ടുകളുണ്ട്.
മമ്മൂട്ടിക്ക് നന്ദി പറഞ്ഞുകൊണ്ടുള്ള സംവിധായകൻ വൈശാഖിന്റെ വൈകാരികമായ പോസ്റ്റാണ് ഇപ്പോൾ ചർച്ചയായിരിക്കുന്നത്. ഒരിക്കൽ കൂടി എന്നിൽ വിശ്വസിച്ചതിന് മമ്മൂക്കയ്ക്ക് ഒരായിരം നന്ദി എന്നാണ് വൈശാഖ് കുറിച്ചത്.
“അടുത്ത 100 ദിവസങ്ങൾ തികച്ചും വെല്ലുവിളി നിറഞ്ഞതാണ്, കാരണം എന്റെ ‘ആദ്യ സിനിമയുടെ’ ഷൂട്ടിംഗ് ഇന്ന് ആരംഭിക്കുകയാണ്. എല്ലാവരുടെയും അനുഗ്രഹവും പ്രാർത്ഥനയും ഒപ്പമുണ്ടാകണം. ഈ സിനിമ യാഥാർത്ഥ്യമാക്കിയതിന് പ്രിയ ഷമീർ മുഹമ്മദിനോട് നന്ദി. പ്രിയ ആന്റോ ജോസഫ്, നിങ്ങൾ നൽകിയ പിന്തുണയും ശക്തിയെയും ഞാൻ അഭിനന്ദിക്കുന്നു. മനോഹരമായൊരു തിരക്കഥ സമ്മാനിച്ച മിഥുൻ മാനുവൽ തോമസിന് നന്ദി. എല്ലാറ്റിനും ഉപരിയായി, ഒരിക്കൽ കൂടി എന്നിൽ വിശ്വസിച്ചതിന് എന്റെ പ്രിയപ്പെട്ട മമ്മൂക്കയ്ക്ക് ഒരായിരം നന്ദി. ഇക്കാലമത്രയും എന്നോടൊപ്പം നിന്ന എല്ലാവരെെയും നന്ദിയോടെ ഓർത്ത് ഈ ടൈറ്റിൽ പോസ്റ്റർ സമർപ്പിക്കുന്നു” എന്നാണ് വൈശാഖ് പങ്കുവെച്ചത്.
മമ്മൂട്ടി കമ്പനി നിർമ്മിക്കുന്ന അഞ്ചാമത്തെ സിനിമയാണ് ‘ടർബോ’. 2021ല് ആണ് ‘മമ്മൂട്ടി കമ്പനി’ എന്ന പ്രൊഡക്ഷന് ഹൗസ് സ്ഥാപിച്ചത്. റോഷാക്, നന്പകല് നേരത്ത് മയക്കം, കണ്ണൂര് സ്ക്വാഡ്, റിലീസാകാനിരിക്കുന്ന കാതല് എന്നിവയാണ് മമ്മൂട്ടി കമ്പനി ഇതുവരെ നിര്മ്മിച്ച ചിത്രങ്ങൾ.
ജസ്റ്റിൻ വർഗീസാണ് ചിത്രത്തിന് സംഗീതമൊരുക്കുന്നത്. വൈശാഖിന്റെ കൂടെ സഹസംവിധായകനായി ഷാജി പാടൂരും പ്രവർത്തിക്കുന്നുണ്ട്. വിഷ്ണു ശർമയാണ് ചിത്രത്തിന് ഛായാഗ്രഹണം നിർവഹിക്കുന്നത്.