സ്വന്തം പ്രൊഡക്ഷനിലെ അഞ്ചാമത്തെ സിനിമ പ്രഖ്യാപിക്കാന് ഒരുങ്ങി മമ്മൂട്ടി. മമ്മൂട്ടി കമ്പനി നിര്മ്മിക്കുന്ന പുതിയ ചിത്രത്തെ കുറിച്ചുള്ള അപ്ഡേറ്റ് ആണ് താരം ഇപ്പോള് പുറത്തുവിട്ടിരിക്കുന്നത്. നാളെ രാവിലെ എട്ടു മണിക്ക് പുതിയ ചിത്രത്തിന്റെ ടൈറ്റില് പുറത്തുവിടും എന്നാണ് മമ്മൂട്ടി വ്യക്തമാക്കിയിരിക്കുന്നത്.
2021ല് ആണ് മമ്മൂട്ടി കമ്പനി എന്ന പ്രൊഡക്ഷന് ഹൗസ് സ്ഥാപിച്ചത്. റോഷാക്, നന്പകല് നേരത്ത് മയക്കം, കണ്ണൂര് സ്ക്വാഡ്, റിലീസാകാനിരിക്കുന്ന കാതല് എന്നിവയാണ് മമ്മൂട്ടി കമ്പനി ഇതുവരെ നിര്മ്മിച്ച ചിത്രങ്ങള്.
ഇതില് കണ്ണൂര് സ്ക്വാഡ് മമ്മൂട്ടിയുടെ കരിയറിലെ തന്നെ വലിയ ബോക്സ് ഓഫീസ് വിജയങ്ങളില് ഒന്നാണ്. ‘ലിയോ’ റിലീസിനിടയിലും 130ല് അധികം സ്ക്രീനുകളില് ആണ് കണ്ണൂര് സ്ക്വാഡ് നാലാം വാരത്തിലും പ്രദര്ശനം തുടരുന്നുണ്ട്. റിലീസ് ചെയ്ത് ഒരു മാസത്തിനുള്ളില് 75 കോടിയും നേടി കുതിക്കുകയാണ് ചിത്രം.
അതേസമയം, ജിയോ ബേബിയുടെ സംവിധാനത്തില് ഒരുങ്ങിയ ‘കാതല്’ ആണ് മമ്മൂട്ടിയുടെതായി ഇനി റിലീസിനൊരുങ്ങുന്ന ചിത്രം. ജ്യോതികയാണ് ചിത്രത്തില് നായിക. വര്ഷങ്ങള്ക്ക് ശേഷം ജ്യോതിക മലയാളത്തിലേക്ക് മടങ്ങിവരുന്ന ചിത്രം കൂടിയാണിത്. ഐഎഫ്എഫ്കെയിലാണ് ചിത്രം ആദ്യം പ്രദര്ശിപ്പിക്കുന്നത്.