പുതിയ ചിത്രത്തിന്റെ ടൈറ്റിലും പൂജാ ചിത്രങ്ങളും പങ്കുവച്ച് ഉണ്ണി മുകുന്ദന്. ‘മാളികപ്പുറം’ എന്നാണ് ചിത്രത്തിന്റെ പേര്. നവാഗതനായ വിഷ്ണു ശശിശങ്കര് ആണ് ചിത്രം സംവിധാനം ചെയ്യുന്നത്. എരുമേലി ശ്രീധര്മ ശാസ്താ ക്ഷേത്രത്തില് വച്ചായിരുന്നു ചിത്രത്തിന്റെ പൂജ ചടങ്ങുകള്. സിനിമയുടെ ചിത്രീകരണം ആരംഭിച്ചതായി ഉണ്ണി ഫെയ്സ്ബുക്കിലൂടെ അറിയിച്ചു.
”എന്റെ പുതിയ സിനിമ ഇന്ന് തുടങ്ങി. ‘മാളികപ്പുറം’ എന്നാണ് പേര്. #Malikappuram എന്റെ മല്ലുസിംഗിന്റെ പ്രൊഡ്യൂസറും ജേഷ്ഠ സഹോദരനുമായ ആന്റോ ചേട്ടന്റെ ഒരു വലിയ സ്വപ്നമാണ് ഈ സിനിമ, മാമാങ്കം സിനിമ പ്രൊഡ്യൂസ് ചെയ്ത വേണു ചേട്ടനും ഇതിന്റെ നിര്മാണ പങ്കാളി ആണ്. എനിക്ക് ഇതിന്റെ ഭാഗമാകാന് കഴിഞ്ഞത് അയ്യപ്പസ്വാമിയുടെ അനുഗ്രഹം കൊണ്ടാണ്.”
”വിഷ്ണു ശശിശങ്കര് സംവിധാനം ചെയ്യുന്ന ചിത്രം എഴുതിയിരിക്കുന്നത് അഭിലാഷ് പിള്ള ആണ്. ഛായാഗ്രഹണം വിഷ്ണു നമ്പൂതിരി. സംഗീതം രഞ്ജിന് രാജ്. എരുമേലി ശ്രീധര്മ ശാസ്താ ക്ഷേത്രത്തില് വച്ചായിരുന്നു പൂജ. പൂജക്ക് ശേഷം ഗണപതിഭഗവാന് തേങ്ങയുടച്ച് മധുരം വിതരണം ചെയ്തു ചിത്രീകരണം ആരംഭിച്ചു” എന്നാണ് ഉണ്ണി മുകുന്ദന് കുറിച്ചിരിക്കുന്നത്.
കാവ്യ ഫിലിം കമ്പനി, ആന് മെഗാ മീഡിയ എന്നീ ബാനറുകളില് പ്രിയ വേണു, നീത പിന്റോ എന്നിവരാണ് ചിത്രത്തിന്റെ നിര്മ്മാണം. സൈജു കുറുപ്പ്, ഇന്ദ്രന്സ്, മനോജ് കെ ജയന്, രമേശ് പിഷാരടി, സമ്പത്ത് റാം, ദേവനന്ദ, ശ്രീപദ് എന്നിവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. അഭിലാഷ് പിള്ളയുടേതാണ് രചന. സംവിധായകന് തന്നെ എഡിറ്റിംഗും നിര്വ്വഹിക്കുന്നു.