ലിജോ ജോസ് പെല്ലിശ്ശേരി മോഹന്ലാല് ചിത്രം മലൈക്കോട്ടൈ വാലിബന്റെ ഫസ്റ്റ് ലുക്ക് പോസ്റ്റര് റിലീസായതിന് പിന്നാലെ ആരാധകര്ക്ക് പ്രത്യേക സമ്മാനം നേടാനുള്ള അവസരം ഒരുക്കുകയാണ് അണിയറപ്രവര്ത്തകര്. മോഹന്ലാലിന്റെയും ലിജോ ജോസ് പെല്ലിശ്ശേരിയുടെയും ഓട്ടോഗ്രാഫ് അടങ്ങിയ വാലിബന്റെ ഫസ്റ്റ് ലുക്ക് മെറ്റല് പോസ്റ്ററുകള് ആണ് ലേലത്തിലൂടെ ആരാധകര്ക്ക് സ്വന്തമാക്കാനാകുക.
പോളിഗോണ് ബ്ലോക്ക് ചെയിന് വഴി വെരിഫൈ ചെയ്ത 25 മെറ്റല് പോസ്റ്ററുകളാണ് ലോകവ്യാപകമായിഒരുക്കുന്നത്. rootfor.xyz എന്ന ലിങ്കില് നിന്നും പ്രേക്ഷകര്ക്ക് മലൈക്കോട്ടൈ വാലിബന്റെ ഒഫീഷ്യല് ബിഡിങ്ങില് പങ്കാളികളാകാം. ചിത്രത്തിന്റെ ഫസ്റ്റ് ലുക്ക് പങ്കുവെച്ചതിനൊപ്പം കോണ്ടസ്റ്റിന്റെ ലിങ്ക് മോഹന്ലാല് തന്നെ കമന്റില് പിന് ചെയ്തിരുന്നു.
ജോണ് മേരി ക്രിയേറ്റിവിന്റെ ബാനറില് ഷിബു ബേബി ജോണ്, സെഞ്ച്വറി ഫിലിംസിന്റെ ബാനറില് കൊച്ചുമോന്, മാക്സ് ലാബിന്റെ അനൂപ് എന്നിവര് ചേര്ന്നാണ് മലൈക്കോട്ടൈ വാലിബന്റെ നിര്മ്മാണം. രാജസ്ഥാനിലെ ഷെഡ്യൂള് പൂര്ത്തിയാക്കി ചെന്നൈ ഷെഡ്യൂളിനായുള്ള ഒരുക്കത്തിലാണ് സംഘം. മോഹന്ലാലിനൊപ്പം മറാഠി നടി സൊണാലി കുല്ക്കര്ണി, ഹരീഷ് പേരടി, ഹരിപ്രശാന്ത് വര്മ്മ, മണികണ്ഠ രാജന്, സുചിത്ര നായര്, മനോജ് മോസസ്, ബംഗാളി നടി കഥ നന്ദി തുടങ്ങിയവരാണ് ചിത്രത്തിലെ അഭിനേതാക്കള്.
വലിയ മുതല്മുടക്കില് ഒരുങ്ങുന്ന മലൈക്കോട്ടൈ വാലിബന് മലയാളത്തിന് പുറമെ ഇന്ത്യയിലെ മറ്റു പ്രധാന ഭാഷകളിലും റിലീസാകും. ‘ആമേന്’ ശേഷം ലിജോയ്ക്ക് വേണ്ടി പിഎസ് റഫീക്ക് തിരക്കഥ ഒരുക്കുന്ന ചിത്രത്തില് ‘ചുരുളി’ക്ക് ശേഷം മധു നീലകണ്ഠന് വീണ്ടും ക്യാമറ ചലിപ്പിക്കുകയാണ്. പ്രശാന്ത് പിള്ള സംഗീതവും ദീപു ജോസഫ് എഡിറ്റിംഗും നിര്വഹിക്കുന്നു. ചിത്രത്തിന്റെ പിആര്ഓ പ്രതീഷ് ശേഖര് ആണ്.