മലയാള സിനിമലോകം ഏറ്റവും കൂടുതൽ പ്രതീക്ഷയോടെ കാത്തിരിക്കുന്ന ഒരു ചിത്രമാണ് ലിജോ ജോസ് പെല്ലിശ്ശേരി- മോഹൻലാൽ കൂട്ടുക്കെട്ടിൽ പുറത്തിറങ്ങുന്ന ‘മലൈക്കോട്ടൈ വാലിബൻ’. നൻപകൽ നേരത്ത് മയക്കം എന്ന ചിത്രത്തിന് ശേഷമെത്തുന്ന എൽ. ജെ. പി ചിത്രമെന്ന പ്രത്യേകതയും വാലിബനുണ്ട്.
ഇപ്പോഴിതാ ചിത്രത്തിന്റെ ഏറ്റവും പുതിയ രണ്ട് പോസ്റ്ററുകൾ പുറത്തുവിട്ടിരിക്കുകയാണ് അണിയറപ്രവർത്തകർ. എന്നാൽ ചിത്രത്തെ കുറിച്ച് യാതൊരു സൂചനകളും പോസ്റ്ററിൽ നിന്നും ലഭിക്കുന്നില്ല. എന്തായാലും മലയാള സിനിമ സാക്ഷ്യം വഹിക്കാൻ പോവുന്നത് ഗംഭീര ദൃശ്യവിരുന്നായിരിക്കും എന്ന കാര്യം ഉറപ്പാണ്.
മോഹൻലാലിന്റെ അഭിനയ ജീവിതത്തിലെ തന്നെ പ്രധാന സിനിമയാവും വാലിബൻ എന്നാണ് പ്രേക്ഷകരും സിനിമ നിരൂപകരും കണക്കുക്കൂട്ടുന്നത്. ചിത്രത്തിന്റെ ഫസ്റ്റ് ലുക്ക് നേരത്തെ എത്തിയിരുന്നു. യോദ്ധാവിന്റെ ലുക്കില് കൈകളില് വടവുമായി മുട്ടുകുത്തി അലറി വിളിക്കുന്ന രീതിയില് ആയിരുന്നു ഫസ്റ്റ് ലുക്കില് മോഹന്ലാല് പ്രത്യക്ഷപ്പെട്ടത്.
‘ആമേൻ’ എന്ന സൂപ്പർ ഹിറ്റ് ചിത്രത്തിന് ശേഷം പി. എസ് റഫീഖ് തിരക്കഥയെഴുതുന്ന ലിജോ ജോസ് പെല്ലിശ്ശേരി ചിത്രം കൂടിയാണ് വാലിബൻ. മറാഠി നടി സൊണാലി കുല്ക്കര്ണി, ഹരീഷ് പേരടി, ഹരിപ്രശാന്ത് വര്മ്മ, മണികണ്ഠന് ആചാരി, സുചിത്ര നായര്, മനോജ് മോസസ്, ബംഗാളി നടി കഥ നന്ദി തുടങ്ങിയവരൊക്കെ ചിത്രത്തില് അഭിനയിക്കുന്നുണ്ട്. ഷിബു ബേബി ജോണും ലിജോയും മോഹന്ലാലും ചേര്ന്നാണ് മലൈകോട്ടൈ വാലിബന് നിര്മ്മിക്കുന്നത്.