നടി അമല പോള് വീണ്ടും വിവാഹിതയാകുന്നു. സുഹൃത്ത് ജഗത് ദേശായിയാണ് അമലയെ വിവാഹം ചെയ്യാനൊരുങ്ങുന്നത്. അമല പ്രൊപ്പോസ് ചെയ്യുന്ന വീഡിയോയാണ് ജഗത് ഇന്സ്റ്റഗ്രാമില് ഇപ്പോള് പങ്കുവച്ചിരിക്കുന്നത്. നേരത്തെ ഇരുവരും പ്രണയത്തിലാണെന്ന വാര്ത്തകള് എത്തിയിരുന്നു.
എന്നാല് ആ വാര്ത്തകളോട് ഇരുവരും പ്രതികരിച്ചിരുന്നില്ല. ‘ജിപ്സി ക്യൂന് യെസ് പറഞ്ഞു’ എന്ന ക്യാപ്ഷനോടെയാണ് പ്രൊപ്പോസ് ചെയ്യുന്ന വീഡിയോ ജഗത് പങ്കുവച്ചിരിക്കുന്നത്. വെഡ്ഡിംഗ് ബെല്സ് എന്ന ഹാഷ്ടാഗും ഇതിനൊപ്പം ജഗത് ചേര്ത്തിട്ടുണ്ട്.
ജഗത്തിന്റെ പ്രൊപ്പോസല് സ്വീകരിച്ച അമല അദ്ദേഹത്തിന് സ്നേഹ ചുംബനം നല്കുന്നതും വീഡിയോയിലുണ്ട്. വീഡിയോയ്ക്ക് താഴെ നിരവധിപ്പേരാണ് ആശംസകളുമായി എത്തുന്നത്. നേരത്തെയും ജഗത് അമലയ്ക്കൊപ്പമുള്ള ചിത്രങ്ങള് പോസ്റ്റ് ചെയ്യാറുണ്ടായിരുന്നു.
View this post on Instagram
2014ല് തമിഴ് സംവിധായകന് എഎല് വിജയ്യെ അമല വിവാഹം കഴിച്ചിരുന്നു. എന്നാല് പിന്നീട് ഇവര് വിവാഹമോചനം നേടി. ‘തലൈവ’ എന്ന വിജയ് സംവിധാനം ചെയ്ത ദളപതി ചിത്രത്തിന്റെ സെറ്റില് വച്ചായിരുന്നു ഇരുവരും പ്രണയത്തിലായത്. തുടര്ന്ന് വളരെ മാധ്യമശ്രദ്ധ നേടിയതായിരുന്നു ഇവരുടെ വിവാഹം.
എന്നാല് പിന്നാലെ വിവാഹമോചന വാര്ത്തയും എത്തി. അതേസമയം, മലയാളത്തില് ‘ആടുജീവിതം’ ആണ് അമലയുടെതായി ഇനി റിലീസിന് ഒരുങ്ങുന്നത്. മലയാളത്തില് മറ്റ് രണ്ട് പ്രോജക്ടുകള് കൂടി താരത്തിന്റെതായി ഒരുങ്ങി കൊണ്ടിരിക്കുന്നുണ്ട്. ബോളിവുഡ് ചിത്രം ‘ഭോല’ ആയിരുന്നു താരത്തിന്റെതായി ഒടുവില് പുറത്തിറങ്ങിയ സിനിമ.