പൃഥ്വിരാജിനോട് മാപ്പ് ചോദിച്ച് എഴുത്തുകാരനും ആക്ടിവിസ്റ്റുമായ മൈത്രേയന്. പൃഥ്വിരാജിനെതിരെ ഒരു അഭിമുഖത്തില് സംസാരിച്ച വാക്കുകള് ചര്ച്ചയായതോടെയാണ് മൈത്രേയന് മാപ്പ് പറഞ്ഞു കൊണ്ട് രംഗത്തെത്തിയിരിക്കുന്നത്. താങ്കളെ അടിക്കാന് പാകത്തിലൊരു വടിയായി മാറിയതില് ഖേദമുണ്ടെന്നും നിരുപാധികം മാപ്പ് ചോദിക്കുന്നുവെന്നും മൈത്രേയന് സോഷ്യല് മീഡിയയില് കുറിച്ചു.
”പൃഥ്വിരാജ് സുകുമാരനില് വിശ്വാസമില്ല. അദ്ദേഹം ഇതുവരെ നല്ലൊരു സിനിമ എടുത്തതായി ഞാന് കേട്ടിട്ട് പോലുമില്ല. അയാള് സംവിധായകനായി മാറിയ ഒരു സിനിമ ഞാന് കണ്ടിട്ടില്ല” എന്നായിരുന്നു ‘എമ്പുരാന്’ സിനിമയെ കുറിച്ച് സംസാരിക്കവെ മൈത്രേയന് പറഞ്ഞത്. ഇത് വിവാദമായതോടെയാണ് മൈത്രേയന് പോസ്റ്റുമായി രംഗത്തെത്തിയിരിക്കുന്നത്.
മൈത്രേയന്റെ കുറിപ്പ്:
ബഹുമാനപൂര്വം പൃഥ്വിരാജിന്,
മൂന്നു പേര് എന്നെ അഭിമുഖ സംഭാഷണം ചെയ്യാന് വന്നു എന്നുള്ള കാര്യം സത്യമാണ്. പല വിഷയങ്ങള് സംസാരിച്ചിരുന്നതില് സിനിമ, സംവിധാനം, അഭിനയം എന്നിവ കൂടി ചര്ച്ച ചെയ്തു എന്ന കാര്യവും സത്യമാണ്. താങ്കള് സംവിധാനം ചെയ്ത സിനിമകളെ പറ്റിയും സംസാരിച്ചിരുന്നു എന്നതും സത്യമാണ്.
ഈ പോസ്റ്ററില് ഉള്ളവരി ഞാന് പറഞ്ഞതും സത്യമാണ്. പക്ഷേ, ഇത്തരം ഒരു പോസ്റ്റര് ഇറക്കാനുള്ള ഉദ്ദേശത്തോടെയാണ് അവര് ആ ചോദ്യങ്ങള് ചോദിച്ചതെന്ന കാര്യം അറിയില്ലായിരുന്നു. താങ്കളെ അടിക്കാന് പാകത്തിലൊരു വടിയായി ഞാന് മാറിയതില് ഖേദിക്കുന്നു. നിരുപാധികം മാപ്പ് ചോദിക്കുന്നു. നിങ്ങളുടെ സിനിമ ഞാന് കാണുന്നതായിരിക്കും.