എം എ നിഷാദ് സംവിധാനം ചെയ്ത സസ്പെന്സ് ത്രില്ലര് “തെളിവ്” നാളെ തിയേറ്ററുകളിലേക്ക് എത്തുകയാണ്. ചിത്രത്തിന്റെ തിയേറ്റര് ലിസ്റ്റ് അണിയറ പ്രവര്ത്തകര് പുറത്തുവിട്ടു. കേരളം മുഴുവന് 53 തിയേറ്ററുകളിലായി ചിത്രം പ്രദര്ശനത്തിനെത്തും. ഒരു കുറ്റാന്വേഷണത്തിന്റെ ഉദ്വേഗജനകമായ വഴികളിലൂടെ കടന്നുപോകുന്ന ചിത്രത്തിന് തിരക്കഥ ഒരുക്കിയിരിക്കുന്നത് ചെറിയാന് കല്പ്പകവാടിയാണ്.
ലാല്, ആശാ ശരത്ത് എന്നിവരാണ് ചിത്രത്തിലെ കേന്ദ്രകഥാപാത്രങ്ങളെ അവതരിപ്പിക്കുന്നത്. രഞ്ജി പണിക്കര്, നെടുമുടി വേണു, ജോയി മാത്യു, സുധീര് കരമന, മീരാ നായര്, സയിദ് മൊഹസിന് ഖാന്, മണിയന്പിള്ള രാജു, രാജേഷ് ശര്മ, അനില് പി നെടുമങ്ങാട്, തെസ്നി ഖാന് എന്നിവരും ചിത്രത്തിലുണ്ട്.ഒറ്റയ്ക്ക് ജീവിക്കുന്ന ഒരു സ്ത്രീ സമൂഹത്തില് നേരിടുന്ന കഠിനമായ പരീക്ഷണങ്ങളും അതിജീവനത്തിനായി നടത്തേണ്ടി വരുന്ന പോരാട്ടങ്ങളും സിനിമയില് പ്രമേയമാകുന്നുണ്ട്.
ഇഥിക പ്രൊഡക്ഷന്സിന്റെ ബാനറില് പ്രേംകുമാറാണ് ചിത്രം നിര്മ്മിച്ചിരിക്കുന്നത്. എം. ജയചന്ദ്രന് പശ്ചാത്തല സംഗീതവും കല്ലറ ഗോപന് സംഗീത സംവിധാനവും നിര്വഹിച്ചിരിക്കുന്നു. കെ. ജയകുമാര്, പ്രഭാവര്മ എന്നിവരാണ് തെളിവിലെ ഗാനങ്ങള് രചിച്ചത്. നിഖില് എസ്. പ്രവീണ് ഛായാഗ്രഹണവും ശ്രീകുമാര് നായര് എഡിറ്റിങ്ങും നിര്വഹിച്ചിരിക്കുന്നു.