തിയേറ്ററുകളില് ആവേശം വിതറിയ ലൂസിഫറിലെ ടൊവീനോ തോമസിന്റെ മാസ് പ്രസംഗത്തിന്റെ മേക്കിംഗ് വീഡിയോ അണിയറ പ്രവര്ത്തകര് പുറത്തുവിട്ടു. ടൊവീനോയുടെ ജതിന് രാംദാസ് എന്ന കഥാപാത്രം വമ്പന് ജനക്കൂട്ടത്തെ അഭിമുഖീകരിച്ച് പ്രസംഗിക്കുന്ന രംഗമായിരുന്നു ഇത്.
“പി.കെ. രാംദാസിന്റെ മകന് മലയാളം പറയാനും അറിയാം, മുണ്ടു മടക്കി കുത്താനും അറിയാം…” എന്നുള്ള ടൊവീനോയുടെ ഡയലോഗില് ഇളകി മറിയുന്ന ജനക്കൂട്ടം സത്യത്തില് സിനിമാപ്രേമികളെ അത്ഭുതപ്പെടുത്തുന്നതായിരുന്നു.
എന്നാല് ആ പ്രസംഗം കാണാനെത്തിയത് വളരെ കുറച്ചാളുകള് മാത്രമാണെന്നതാണ് പുറത്തുവന്ന മേക്കിംഗ് വീഡിയോയില് വ്യക്തമാകുന്നത്. ബാക്കിയൊക്കെ സംവിധായകന്റെ കഴിവും വിഷ്വല് എഫക്ടുകളുമാണ് ആ സിനീനെ ഇത്ര ഗംഭീരമാക്കിയത്. നേരത്തെ മോഹന്ലാലിന്റെ എന്ട്രി സീനിന്റയും ചിത്രത്തിലെ ഏറ്റവും ചെലവേറിയ രംഗമായ കണ്ടെയ്നര് സ്ഫോടനത്തിന്റെയും തുടങ്ങി ആറോളം മേക്കിംഗ് വീഡിയോകള് അണിയറ പ്രവര്ത്തകര് പുറത്തു വിട്ടിരുന്നു.
പൃഥ്വിരാജ് ആദ്യമായി സംവിധാനം ചെയ്ത ചിത്രമാണ് ലൂസിഫര്. പൊളിറ്റിക്കല് ത്രില്ലര് ഗണത്തില് പെടുന്ന ചിത്രത്തില് സ്റ്റീഫന് നെടുമ്പിള്ളി എന്ന രാഷ്ട്രീയ പ്രവര്ത്തകനെയാണ് മോഹന്ലാല് അവതരിപ്പിച്ചത്. വലിയ മുതല്മുടക്കില് ഒരുങ്ങിയ ചിത്രത്തിന്റെ തിരക്കഥ മുരളി ഗോപിയുടേതായിരുന്നു.