വിക്രത്തിന്റെ വിജയം ആരാധകർക്കൊപ്പം ആഘോഷമാക്കാൻ സംവിധായകൻ ലോകേഷ് കനകരാജും സംഗീത സംവിധായകൻ അനിരുദ്ധ രവിചന്ദറും തൃശ്ശൂരിലേക്ക്. ലോകേഷ് കനകരാജ് സംവിധാനം ചെയ്ത ചിത്രം വിക്രം കേരളത്തിലും വൻ വിജയമായതോടെയാണ് ആരാധകർക്കൊപ്പം ആഘോഷിക്കാൻ ഇരുവരും തൃശ്ശൂർ രാഗം തിയേറ്റററിലേക്ക് എത്തുന്നത്.
കേരളത്തിൽ ഏറ്റവും കൂടുതൽ കളക്ഷൻ സ്വന്തമാക്കിയ തമിഴ് ചിത്രം എന്ന റെക്കോർഡ് നിലവിൽ ‘വിക്ര’മിനാണ്. ഏറ്റവും കൂടുതൽ വരുമാനം നേടിയത് തൃശ്ശൂരിലെ രാഗം തിയേറ്ററിൽ നിന്നാണ്. ജൂൺ 13 തിങ്കളാഴ്ച ഉച്ചയ്ക്ക് 12 മണിക്കാണ് ഇരുവരും തിയേറ്റററിൽ സന്ദർശനം നടത്തുന്നത്.
ജൂൺ 3 ന് റിലീസ് ചെയ്ത ചിത്രം 250 കോടിയിലധികമാണ് ബോക്സ് ഓഫീസിൽ വരുമാനം നേടിയത്. ഫഹദ് ഫാസിൽ, വിജയ് സേതുപതി, , ഗായത്രി ശങ്കർ, ചെമ്പൻ വിനോദ്, കാളിദാസ് ജയറാം തുടങ്ങി വലിയതാരനിര തന്നെ ചിത്രത്തിൽ അണിനിരക്കുന്നുണ്ട്.
അതിഥി വേഷത്തിലാണ് ചിത്രത്തിൽ സൂര്യ എത്തുന്നത്. സൂര്യ പ്രതിഫലം വാങ്ങാതെ അഭിനയിച്ച ചിത്രം കൂടിയാണ് വിക്രം. രാജ്കമല് ഫിലിംസ് ഇന്റര്നാഷണലിന്റെ ബാനറിൽ കമല്ഹാസന് തന്നെയാണ് ‘വിക്രം’ സിനിമയുടെ പ്രധാന നിര്മ്മാതാവ്. ചിത്രം ഇപ്പോഴും വിജയകരമായി പ്രദർശനം തുടരുകയാണ്.