പുതുമുഖതാരങ്ങളെ അണിനിരത്തി കബീര് പുഴമ്പ്ര സംവിധാനം ചെയ്യുന്ന ‘ലാല്ജോസ്’ ചിത്രത്തിലെ ‘കണ്ണും കണ്ണും’ ഗാനത്തിന്റെ ലിറിക്കല് വീഡിയോ പുറത്ത്. വിജയ് യേശുദാസ് ആണ് ഗാനം ആലപിച്ചിരിക്കുന്നത്. ജോ പോള് ഒരുക്കിയ വരികള്ക്ക് ബിനീഷ് മണിയാണ് സംഗീതം ഒരുക്കിയത്. ചിത്രം മാര്ച്ച് 18ന് ആണ് റിലീസിന് ഒരുങ്ങുന്നത്.
ചിത്രത്തിന്റെ കഥ, തിരക്കഥ, സംഭാഷണവും സംവിധായകന് തന്നെയാണ് ഒരുക്കുന്നത്. 666 പ്രൊഡക്ഷന്സിന്റെ ബാനറില് ഹസീബ് മേപ്പാട്ട് ആണ് ചിത്രം നിര്മ്മിക്കുന്നത്. മലയാളത്തിലെ പ്രമുഖ സംവിധായകനായ ലാല്ജോസിന്റെ പേരുതന്നെയാണ് ചിത്രത്തിന്റെ ടൈറ്റില് എന്നത് സോഷ്യല് മീഡിയയില് ചര്ച്ചയാണ്.
സിനിമയെയും സിനിമ പ്രവര്ത്തകരെയും ആരാധിച്ചു നടക്കുന്ന ഒരു ചെറുപ്പക്കാരന്റെ ജീവിതത്തിലെ വഴിത്തിരിവാണ് ചിത്രത്തിന്റെ കേന്ദ്ര പ്രമേയം. സസ്പെന്സും ത്രില്ലും നിറഞ്ഞ ഒരു ഫാമിലി എന്റര്ടെയ്നറാണ് ലാല്ജോസ്. വെബ്സീരിയലുകളിലൂടെ ശ്രദ്ധേയനായ യുവനടന് ശാരിഖ് ആണ് നായകന്.
പുതുമുഖ നടി ആന് ആന്ഡ്രിയയാണ് നായിക. ഭഗത് മാനുവല്, ജെന്സണ്, റിസബാവ, കലിങ്ക ശശി, ടോണി, മജീദ്, കലാഭവന് ഹനീഷ്, വിനോദ് കെടാമംഗലം, സാലു കുറ്റനാട്, ദേവി അജിത്ത്, ദേവിക, മാളവിക, ഫജ്ത, രാജേഷ് ശര്മ്മ, വി.കെ. ബൈജു എന്നിവരും ബാലതാരങ്ങളായ നിഹാര ബിനേഷ് മണി, ആദിത് പ്രസാദ് എന്നിവരും ചിത്രത്തില് വേഷമിടുന്നു.
ഛായാഗ്രഹണം-ധനേഷ്, ബിജിഎം-ഗോപി.സുന്ദര്, സംഗീതം-ബിനേഷ് മണി, ഗാനരചന-ജോ പോള്, മേക്കപ്പ്-രാജേഷ് രാഘവന്, കോസ്റ്റ്യൂംസ്-റസാഖ് തിരൂര്, ആര്ട്ട്-ബിജു പൊന്നാനി, പ്രൊഡക്ഷന് കണ്ട്രോളര്-ഇ.എ ഇസ്മയില്, പി.ആര്.ഒ-പി.ആര് സുമേരന്.