ദുല്ഖര് സല്മാന് ചിത്രം കുറുപ്പ് സൂപ്പര് ഹിറ്റിലേക്ക് കുതിച്ചപ്പോള് പ്രേക്ഷകര് ഒരുപോലെ ചോദിച്ച ചോദ്യമാണ് ചിത്രത്തിന്റെ രണ്ടാം ഭാഗം എന്ന് വരുമെന്ന് അതിനിടയിലാണ് സംവിധായകനായ ശ്രീനാഥ് രാജേന്ദ്രന്റെ ആ ഉറപ്പ് കൂടി എത്തുന്നത്. ‘സെക്കന്റ് പാര്ട്ട് പ്രതീക്ഷച്ചോളു.. കുറച്ചു കാലം എടുക്കുമെന്നേ ഒള്ളു. പക്ഷെ ലേറ്റ് ആയി വന്താലും രസമായി തന്നെ വരും..’ ഈ വാര്ത്ത ഏറെ സന്തോഷത്തോടുകൂടിയയാണ് ഫാന്സുകാരും ഏറ്റെടുത്തിരിക്കുന്നത്.
ഇപ്പോള് രണ്ടാം ഭാഗത്തിനുള്ള സൂചനകള് തന്നുകൊണ്ട് ദുല്ഖുര് സല്മാന് തന്നെ ചിത്രത്തിന്റെ ക്യാരക്ടര് മോഷന് പോസ്റ്ററും സോഷ്യല് മീഡിയയില് പങ്കു വച്ചിരിക്കുകയാണ്. കുറുപ്പ് സിനിമയുടെ അവസാന ഭാഗത്തില് കുറുപ്പിന് നാട്ടില് നില്ക്കാനാവാത്ത സാഹചര്യത്തില് നാടുവിട്ട് വിദേശത്തേക്ക് പോകുകയും അവസാനം ഫിന്ലന്ഡിന്റെ തലസ്ഥാനമായ ഹെല്സിങ്കിയില് വച്ചുള്ള ഒരു സീനില് സംവിധായകന് രണ്ടാംഭാഗത്തിന്റെ സാധ്യതകളെ അവതരിപ്പിച്ചിരുന്നു. ‘അലക്സാണ്ടര്’ എന്ന വ്യാജപേരിലാണ് കുറുപ്പ് അവിടെ കഴിയുന്നത് എന്നും ചിത്രം പറഞ്ഞിരുന്നു.
രണ്ടാം ഭാഗത്തില് ‘അലക്സാണ്ടറി’നെ കേന്ദ്ര കഥാപാത്രമാക്കി വരും എന്ന് അണിയറക്കാര് ഉറപ്പിച്ചിരിക്കുന്ന സ്ഥിതിക്ക് ആകാംഷയോടൊപ്പം നിരവധി ചോദ്യങ്ങളും ഉയര്ത്തുന്നുണ്ട്. ഇതുവരെ ഉള്ള കുറുപ്പിന്റെ കഥ സുകുമാര കുറിപ്പിന്റെ കേസുമായി ബന്ധപ്പെട്ട അന്വേഷണ കുറിപ്പുകളിലൂടെയും, ദൃക്സാക്ഷികളുടെയും സാഹചര്യ തെളിവുകളുടെയും അടിസ്ഥാനത്തില് ആയിരുന്നു. എന്നാല് അലക്സാണ്ടര് തികച്ചും വ്യത്യസ്തമായിരിക്കും. റിയാലിറ്റിയില് നിന്ന് മാറി ഒരു ഫിക്ഷനിലേക്ക് കഥ വഴി മാറും. അപ്പോള് കൊണ്ടുവരാന് പോകുന്ന വ്യത്യസ്തകളെ കുറിച്ചും പ്രേക്ഷകരുടെ ഇടയില് ചര്ച്ച ചെയ്യുന്നുണ്ട്.
കുറുപ്പ് തിയേറ്ററുകളില് പ്രകമ്പനം സൃഷ്ടിക്കുന്നതിന് മുമ്പ് തന്നെ മൗത്ത് പബ്ലിസിറ്റിയിലൂടെ പ്രേക്ഷക ശ്രദ്ധ നേടിയിരുന്നു. റിലീസിന് ശേഷം ആദ്യ രണ്ടാഴ്ച കൊണ്ട് ആഗോള തലത്തില് ചിത്രം 75 കോടി ഗ്രോസ് നേടിയെന്ന് അണിയറപ്രവര്ത്തകര് അറിയിച്ചു. അതേസമയം ചിത്രം തിയേറ്ററുകളില് ചിത്രത്തിന്റെ പ്രദര്ശനം തുടരുമ്പോള് ഇനി വീട്ടിലിരുന്നും ചിത്രം കാണാനാവും.