ആലപ്പുഴ പട്ടണത്തിന്റെ കഥയുമായി നവാഗതനായ സാഗർ ഹരി ഒരുക്കുന്ന ചിത്രമാണ് “കുമ്പാരീസ്.” കുട്ടനാടിന്റെ ദൃശ്യ ഭംഗിയിലെത്തുന്ന ചിത്രം നാല് യുവാക്കളുടെ കഥയാണ് പറയുന്നത്. ചിത്രത്തിലെ “മെല്ലെ മിഴികൾ കൂടൊരുക്കി” എന്ന ഗാനമാണ് ഇപ്പോൾ ശ്രദ്ധേയമാകുന്നത്. വിനീത് ശ്രീനിവാസൻ ആലപിച്ച ഗാനം തരംഗമാവുകയാണ്.
കുട്ടനാടിന്റെ ദൃശ്യഭംഗിയിൽ ഒരുക്കിയ ഗാനം സോഷ്യൽ മീഡിയയിൽ വൈറലായിക്കൊണ്ടിരിക്കുകയാണ്. റിലീസ് ചെയ്ത് ഒരു ദിവസം പിന്നിടുമ്പോള് ഗാനത്തിന് അരലക്ഷത്തിനടുത്ത് കാഴ്ച്ചക്കാരുണ്ട്. ചിത്രത്തിലെ കലിപ്പ് എന്ന പ്രൊമോ സോങ്ങും ആലപ്പുഴ പാട്ട് എന്ന പേരിൽ വൈറലായിരുന്നു. അബ്രഹാമിന്റെ സന്തതികൾ, ക്യാപ്റ്റൻ എന്നീ ചിത്രങ്ങൾക്ക് ശേഷം ഗുഡ്വിൽ എന്റ്റർറ്റെയിൻമെന്റ്സിന്റെ ബാനറിൽ ജോബി ജോർജ് ആണ് ചിത്രം നിർമ്മിക്കുന്നത്.
അശ്വിൻ ജോസ്, എൽദോ മാത്യു, ജെൻസൺ, ഷാലു റഹിം എന്നിവരെ കേന്ദ്ര കഥാപാത്രങ്ങളാക്കിയാണ് ചിത്രം ഒരുങ്ങുന്നത്. രമേഷ് പിഷാരടി, പുതുമുഖ താരങ്ങളായ റോണ, അസ്ത്രാ ലക്ഷ്മി, ഷാനു ബൂട്ടോ, അൻസാർ, സുജിത്ത്, ശ്രീകാന്ത്, ജിജോ ജോർജ് എന്നീ താരങ്ങളും ചിത്രത്തിൽ പ്രധാന വേഷത്തിൽ എത്തുന്നു. ശ്രീകാന്ത് ഈശ്വർ ആണ് ഛായാഗ്രഹണം.