കാര്ത്തിയുടെ കരിയറിലേ തന്നെ ഏറ്റവും വലിയ ഹിറ്റിലേക്ക് കുതിക്കുകയാണ് കൈദി. ലോകേഷ് കനകരാജ് സംവിധാനം ചെയ്ത ചിത്രം തമിഴ്നാട്ടില് നിന്നും അഞ്ച് ദിവസം കൊണ്ട് വാരിയത് 18.4 കോടിയാണ്. കേരളത്തില് നിന്ന് ആദ്യ ആഴ്ച്ച 5.26 കോടിയും. ചിത്രം വിജയകരമായി പ്രദര്ശനം തുടരുമ്പോള് ചിത്രത്തിലെ ഒരു രംഗം പുറത്തുവിട്ടിരിക്കുകയാണ് അണിയറപ്രവര്ത്തകര്.
ഒരു ബക്കറ്റ് ബിരിയാണി നിമിഷങ്ങള് കൊണ്ട് അകത്താക്കുന്ന കാര്ത്തിയുടെ “ഡില്ലി” എന്ന കഥാപാത്രമാണ് വീഡിയോയില്. കൈദി സിനിമയില് ആരാധകരെ അമ്പരപ്പെടുത്തിയ രംഗമായിരുന്നു ഇത്. നാല് മിനിറ്റ് ദൈര്ഘ്യമുള്ള രംഗമാണ് അണിയറ പ്രവര്ത്തകര് റിലീസ് ചെയ്തിരിക്കുന്നത്. സിനിമയുടെ തെലുങ്ക് പതിപ്പില് നിന്നുള്ള ഈ രംഗമാണ് റിലീസ് ചെയ്തത്.
മാനഗരം എന്ന ചിത്രത്തിനു ശേഷം ലോകേഷ് കനകരാജ് സംവിധാനം ചെയ്ത ത്രില്ലര് ചിത്രമാണ് കൈദി. നായികയില്ല, ഗാനങ്ങളില്ല, പ്രണയരംഗങ്ങളില്ല എന്നതാണ് സിനിമയുടെ മറ്റൊരു പ്രത്യേകത. രണ്ടരമണിക്കൂര് ദൈര്ഘ്യമുള്ള ചിത്രത്തിന്റെ ഭൂരിഭാഗം കഥയും അരങ്ങേറുന്നത് രാത്രിയിലാണ്. തമിഴ്നാട്ടിലെ മയക്കുമരുന്ന്, ഗുണ്ടാ മാഫിയകളും പൊലീസും തമ്മിലുള്ള പോരാട്ടത്തിന്റെ കഥയാണ് ചിത്രം പറയുന്നത്.