പൃഥ്വിരാജ്-ആന്റോ ജോസഫ് കൂട്ടുകെട്ടിലൊരുങ്ങുന്ന ബിഗ് ബഡ്ജറ്റ് ചിത്രം “കറാച്ചി 81″ന്റെ ഫസ്റ്റ്ലുക്ക് പോസ്റ്റര്‍ സോഷ്യല്‍ മീഡിയയില്‍ തരംഗമായിരിക്കുകയാണ്. പോസ്റ്ററിലെ പൃഥ്വിരാജിന്റെ ചിത്രം ഇന്ത്യന്‍ 2വിലെ സേനാപതിയെ ഓര്‍മ്മിപ്പിക്കുന്നുവെന്ന് ധാരാളം ആരാധകര്‍ കമന്റ് ചെയ്തിട്ടുണ്ട്. പോസ്റ്റര്‍ വലിയ പ്രതീക്ഷയാണ് നല്‍കുന്നതെന്നും ഈ സിനിമ ചരിത്രമാകുമെന്നും കമന്റുകളുണ്ട്.പൃഥ്വിരാജിനൊപ്പം ടൊവീനോ തോമസും ചിത്രത്തില്‍ പ്രധാന വേഷത്തിലെത്തും.
ആന്റോ ജോസഫ് നിര്‍മ്മിക്കുന്ന ഈ ചിത്രം സംവിധാനം ചെയ്യുന്നത് കെ എസ് ബാവയാണ്. അന്‍വര്‍ ഹുസൈനും കെ എസ് ബാവയും ചേര്‍ന്നാണ് തിരക്കഥ ഒരുക്കുന്നത്. സുജിത്ത് വാസുദേവ് ഛായാഗ്രഹണം നിര്‍വ്വഹിക്കുന്ന ചിത്രത്തിന് സംഗീതമൊരുക്കുന്നത് ജേക്സ് ബിജോയ് ആണ്. എഡിറ്റിംഗ് മഹേഷ് നാരായണന്‍.
സാറ്റലൈറ്റുകളും ഡിജിറ്റല്‍ സംവിധാനങ്ങളും ഇല്ലാതിരുന്ന കാലത്ത് യുദ്ധം നേരിട്ടവരുടെ കഥയുമായാണ് പൃഥ്വി എത്തുന്നത്. രാജ്യം കണ്ട എറ്റവും വലിയ ചാരവൃത്തിയുടെ കഥയാവുമിതെന്നാണ് സൂചന. സിനിമയുടെ പ്രമേയവുമായി ബന്ധപ്പെട്ട ചില സൂചനകള്‍ കഴിഞ്ഞ ദിവസം നടന്‍ ഫെയ്സ്ബുക്ക് പേജിലൂടെ പങ്കുവച്ചിരുന്നു.
