‘കണ്ണപ്പ’ സിനിമയുടെ ഹാര്‍ഡ് ഡിസ്‌ക് മോഷണം പോയതില്‍ ഞെട്ടിയിരിക്കുകയാണ് സിനിമാലോകം. റിലീസിന് ഒരു മാസം മാത്രം ബാക്കി നില്‍ക്കവെയാണ് സുപ്രധാന വിഎഫ്എക്‌സ് രംഗങ്ങള്‍ അടങ്ങിയ ഹാര്‍ഡ് ഡിസ്‌ക് മോഷണം പോയിരിക്കുന്നത്. ഹൈദരാബാദ് ഫിലിം നഗറിലെ നിര്‍മ്മാണ കമ്പനിയായ ട്വന്റി ഫോര്‍ ഫ്രെയിംസ് ഫാക്ടറി പ്രൈവറ്റ് ലിമിറ്റഡിന്റെ ഓഫീസില്‍ നിന്ന് ഹാര്‍ഡ് ഡിസ്‌ക് മോഷ്ടിക്കപ്പെട്ടത്.
ഹാര്‍ഡ് ഡിസ്‌ക് നഷ്ടപ്പെട്ടതിന് പിന്നില്‍ വ്യക്തിപരമായ പകയും അട്ടിമറി ലക്ഷ്യവും ഉണ്ടെന്നാണ് നിര്‍മ്മാണ കമ്പനി പറയുന്നത്. മോഷണത്തിന് പിന്നില്‍ ആരാണെന്ന കാര്യം രഹസ്യമല്ല. തങ്ങള്‍ക്കും പൊലീസിനും കൃത്യമായി അറിയാമെന്നും നിര്‍മ്മാണ കമ്പനിയായ ട്വന്റി ഫോര്‍ ഫ്രെയിംസ് ഫാക്ടറി പ്രസ്താവനയില്‍ പറഞ്ഞു.
”കണ്ണപ്പയുടെ റിലീസ് തടസ്സപ്പെടുത്താനുള്ള തീവ്രമായ ശ്രമത്തിന്റെ ഭാഗമായി ഇതിന് പിന്നിലുള്ളവര്‍ ചിത്രത്തിന്റെ 90 മിനിറ്റിലധികം ഭാഗഭങ്ങള്‍ ഓണ്‍ലൈനില്‍ ചോര്‍ത്താന്‍ പദ്ധതിയിട്ടിരുന്നു. അതുമായി ബന്ധപ്പെട്ട രഹസ്യ വിവരങ്ങള്‍ പുറത്തുവന്നിട്ടുണ്ട്. ഈ വിവരങ്ങള്‍ എക്‌സിക്യൂട്ടീവ് പ്രൊഡ്യൂസര്‍ സൈബര്‍ ക്രൈം ഉദ്യോഗസ്ഥര്‍ക്ക് ഔദ്യോഗികമായി കൈമാറിയിട്ടുണ്ട്.”
”സംഭവത്തില്‍ എത്രയും പെട്ടന്ന് കര്‍ശന നടപടിയെടുക്കാനും ആവശ്യപ്പെട്ടിട്ടുണ്ട്. ഇന്‍ഡസ്ട്രിയല്‍ നിന്ന് തന്നെ ഇത്തരത്തിലുള്ള വിലകുറഞ്ഞ കുതന്ത്രങ്ങള്‍ കാണുന്നത് നിരാശാജനകമാണ്. പിന്നില്‍, വ്യക്തിപരമായ പകയും അട്ടിമറി ലക്ഷ്യവുമുണ്ട്. തെലുങ്ക് സിനിമ ആഗോളതലത്തില്‍ അംഗീകാരം നേടിക്കൊണ്ടിരിക്കുന്ന ഒരു സമയത്ത് ഇത്തരം പ്രവര്‍ത്തികള്‍ അപമാനകരമാണ്” എന്ന് ട്വന്റി ഫോര്‍ ഫ്രെയിംസ് ഫാക്ടറി പ്രസ്താവനയില്‍ വ്യക്തമാക്കി.
ട്വന്റി ഫോര്‍ ഫ്രെയിംസ് ഫാക്ടറിയുടെ ബാനറില്‍ വിഷ്ണു മഞ്ചുവിന്റെ പിതാവും നടനുമായ മോഹന്‍ ബാബുവാണ് ചിത്രം നിര്‍മ്മിക്കുന്നത്. മുകേഷ് കുമാര്‍ സിങ് ആണ് ചിത്രം സംവിധാനം ചെയ്യുന്നത്. മോഹന്‍ലാല്‍, പ്രഭാസ്, അക്ഷയ് കുമാര്‍, കാജല്‍ അഗര്‍വാള്‍ അടക്കമുള്ള വമ്പന്‍ താരങ്ങള്‍ സിനിമയില്‍ കാമിയോ റോളില്‍ എത്തുന്നുണ്ട്.