ടൊവിനോ തോമസ് പൊലീസ് വേഷത്തിലെത്തുന്ന “കല്ക്കി”യുടെ ട്രെയിലര് ഇന്നെത്തും. വൈകിട്ട് ഒന്പതിന് മോഡന്ലാല് തന്റെ ഒഫീഷ്യല് പേജിലൂടെ ട്രെയിലര് റിലീസ് ചെയ്യും. നേരത്തെ എത്തിയ ചിത്രത്തിന്റെ ടീസറുകളും പോസ്റ്ററുകളും മികച്ച സ്വീകാര്യതയാണ് സോഷ്യല് മീഡിയയില് നേടിയത്. അതിനാല് തന്നെ ഒരു മാസ് ട്രെയിലര് തന്നെയാണ് ആരാധകര് പ്രതീക്ഷിക്കുന്നതും.
സെക്കന്ഡ് ഷോ, കൂതറ, തീവണ്ടി എന്നീ ചിത്രങ്ങളുടെ ചീഫ് അസോഷ്യേറ്റായിരുന്ന പ്രവീണ് പ്രഭാറാം ആദ്യമായി സംവിധാനം ചെയ്യുന്ന ചിത്രമാണ് കല്ക്കി. “എസ്ര”യ്ക്ക് ശേഷം ടൊവീനോ പൊലീസ് വേഷത്തിലെത്തുന്ന ചിത്രമാണ് ഇത്. സുജിന് സുജാതനും സംവിധായകന് പ്രവീണും ചേര്ന്നാണ് ചിത്രത്തിന് തിരക്കഥയൊരുക്കിയിരിക്കുന്നത്. ചിത്രത്തിസലെ ടൊവീനോയുടെ കലിപ്പ് ലുക്ക് ഇതിനോടകം തന്നെ ഏറെ പ്രശംസ നേടിയിട്ടുണ്ട്.
ചിത്രത്തില് സംയുക്ത മേനോനാണ് നായിക. ലിറ്റില് ബിഗ് ഫിലിംസിന്റെ ബാനറില് പ്രശോഭ് കൃഷ്ണയ്ക്കൊപ്പം സുവിന് കെ വര്ക്കിയും ചേര്ന്നാണ് ചിത്രം നിര്മ്മിക്കുന്നത്. ഗൗതം ശങ്കര് ആണ് ഛായാഗ്രഹണം. സെന്ട്രല് പിക്ചേഴ്സാണ് ചിത്രം വിതരണത്തിനെത്തിക്കുന്നത്. ചിത്രം ഈ മാസം റിലീസിന് എത്തും.