രജനികാന്തിനെ നായകനാക്കി നെൽസൺ ദിലീപ് കുമാർ സംവിധാനം ചെയ്ത ‘ജയിലർ’ ലോകമെമ്പാടുമായി 580 കോടിയിലേറെ കളക്ഷൻ നേടി വാർത്തകളി ലിടം നേടിയിരിക്കുകയാണ്, ഏറ്റവും കൂടുതൽ കളക്ഷൻ നേടുന്ന തമിഴ് സിനിമ എന്ന റെക്കോർഡും സിനിമ സ്വന്തമാക്കിയിരുന്നു.
ചിത്രത്തിന്റെ വിജയത്തോടെ സിനിമയുടെ നിർമ്മാതാവ് കലാനിധി മാരൻ രജനികാന്തിന് 1.25 കോടി രൂപയുടെ ബി. എം. ഡബ്ലിയു സമ്മാനമായി നല്കിയിരുന്നു, കൂടാതെ സംവിധായകനായ നെൽസൺ ദിലീപ്കുമാറിനും സിനിമയിലെ മറ്റ് ചില അണിയറപ്രവർത്തകർക്കും കലാനിധി മാരൻ സമ്മാനങ്ങൾ നല്കിയിയിരുന്നു.
ഇപ്പോൾ പുറത്തുവന്ന കണക്കുകൾ പ്രകാരം സൺ പിക്ചേഴ്സിന്റെയും സൺ ടിവിയുടെയും ഉടമയായ കലാനിധി മാരനാണ് ഇന്ത്യയിലെ ഏറ്റവും സമ്പന്നനായ ചലച്ചിത്ര നിർമ്മാതാവ്. ഫോബ്സ് റിപ്പോർട്ട് ചെയ്യുന്നതിനനുസരിച്ച് 2022 ൽ മാരന്റെ ആസ്തി 2 ബില്ല്യൺ ഡോളറിൽ കൂടുതലായി കണക്കാക്കുന്നു.
എന്നാൽ ഏറ്റവും പുതിയ കണക്കുകൾ പ്രകാരം കലാനിധി മാരന്റെ ആസ്തി 2.3 ബില്ല്യൺ ഡോളറായി (19000 കോടി രൂപ) ഉയർന്നിരിക്കുന്നു. കരൺ ജോഹർ, ആദിത്യ ചോപ്ര, സാജിദ് നദിയദ് വാല, റോണി സ്ക്രൂവാല തുടങ്ങിയ ചലച്ചിത്ര നിർമ്മാതാക്കളേക്കാൾ ഒരുപാട് മുന്നിലാണ് കലാനിധി മാരൻ.
മാത്രമല്ല ഇന്ത്യയിലെ ഏതൊരു എക്സിക്യൂട്ടീവിനെക്കാൾ ഉയർന്ന ശമ്പളം കലാനിധി മാരൻ കൈപ്പറ്റുന്നുണ്ട്. ഫിനാൻഷ്യൽ എക്സ്പ്രസ്സ് റിപ്പോർട്ട് ചെയ്യുന്നതിനനുസരിച്ച് 2021-22 കാലഘട്ടത്തിലെ കലാനിധി മാരന്റെ ശമ്പളം 87.50 കോടി രൂപയാണ്. 2019 വരെ പ്രതിവർഷം 15 കോടി രൂപവരെ ശമ്പളം കൈപ്പറ്റിയ മുകേഷ് അംബാനിയെക്കാൾ എത്രയോ മുന്നിലാണ് കലാനിധി മാരൻ.
12800 കോടി രൂപയുമായി റോണി സ്ക്രൂവാലയാണ് ഇന്ത്യയിലെ ഏറ്റവും ധനികനായ രണ്ടാമത്തെ ചലച്ചിത്ര നിർമ്മാതാവ്, മൂന്നാം സ്ഥാനത്ത് 7500 കോടി രൂപയുമായി യാഷ് രാജ് ഫിലിംസിന്റെ ആദിത്യ ചോപ്ര മൂന്നാം സ്ഥാനത്തും, 7400 കോടി രൂപയുമായി ഇറോസിന്റെ അർജുൻ കിഷോർ നാലാം സ്ഥാനത്തുമാണ് ഉള്ളത്. 1700 കോടി രൂപ ആസ്തിയുള്ള കരൺ ജോഹർ അഞ്ചാം സ്ഥാനത്താണ്.