മലയാള സിനിമയിൽ ജൂനിയർ അർട്ടിസ്റ്റായി കരിയർ തുടങ്ങി പിന്നീട് നിരവധി ചെറിയ വേഷങ്ങളിലൂടെ സിനിമയുടെ ഭാഗമാവുകയും ശേഷം നായകനായി തന്റെ കഴിവ് തെളിയിക്കുകയും ചെയ്ത താരമാണ് ജോജു ജോർജ്. പിന്നീട് നിർമ്മാതാവായും ജോജു മികച്ച സിനിമകളുടെ ഭാഗമായി മാറി.
മലയാള സിനിമയിൽ ജോജു അരങ്ങേറ്റം കുറിച്ച സിനിമയാണ് പണി. ഒടിടിയിൽ നാലുഭാഷകളിലും ഒന്നാമത് എത്തിയിരിക്കുകയാണ് ചിത്രം. ഒടിടി പ്ലേയുടെ ടോപ് ടെൻ ട്രെൻഡിങ് ലിസ്റ്റിൽ മലയാളം, തമിഴ്, തെലുഗു, ഹിന്ദി എന്നീ നാലു ഭാഷകളിൽ മുന്നിലെത്തിയിരിക്കുകയാണ് പണി.
ഇതോടെ ഒരേസമയം നാലു ഭാഷകളിലും തരംഗമായി മാറിയിരിക്കുകയാണ് ചിത്രം. ആദ്യമായാണ് ഒരു മലയാളി നായകൻ എന്ന നിലയിലും സംവിധായകൻ എന്ന നിലയിലും ഈ നേട്ടം കൈവരിക്കുന്നത്.
ജോജു തന്നെയാണ് തിരക്കഥയും രചിച്ചിരിക്കുന്നത്. വേണു ഐഎസ്സി, ജിന്റോ ജോർജ് എന്നിവരാണ് ചിത്രത്തിന് വേണ്ടി ഛായാഗ്രഹണം നിർവഹിച്ചത്. നേരത്തെ അഭിപ്രായ ഭിന്നതകളെ തുടർന്ന് വേണു ചിത്രത്തിൽ നിന്നും പിന്മാറിയത് വലിയ വാർത്തയായിരുന്നു.