ജോജു ജോര്ജിനെ നായകനാക്കി നവാഗത സംവിധായകന് സന്ഫീര് കെ ഒരുക്കുന്ന “പീസ്” സിനിമയുടെ ചിത്രീകരണം പൂര്ത്തിയായി. മൂന്ന് ഷെഡ്യൂളുകളിലായി 75 ദിവസങ്ങള് കൊണ്ടാണ് ചിത്രത്തിന്റെ ഷൂട്ടിംഗ് പൂര്ത്തിയായിരിക്കുന്നത്. തൊടുപുഴ, എറണാകുളം, കോട്ടയം എന്നിവിടങ്ങളിലായി കോവിഡ് മാനദണ്ഡങ്ങള് പാലിച്ചു കൊണ്ടാണ് ഷൂട്ടിംഗ് നടന്നത്.
ചിത്രീകരണ വേളയിലുള്ള ജോജുവിന്റെ ബൈക്കഭ്യാസ പ്രകടനം സോഷ്യല് മീഡിയയില് വൈറല് ആയിരുന്നു. കാര്ലോസ് എന്ന ഡെലിവറി ബോയ്യുടെ ജീവിതത്തില് നടക്കുന്ന സംഭവങ്ങളാണ് ചിത്രത്തിലൂടെ അവതരിപ്പിക്കുന്നത്. ഷാലു റഹീം, രമ്യാ നമ്പീശന്, അനില് നെടുമങ്ങാട്, അതിഥി രവി, സിദ്ധിഖ്, ആശ ശരത്ത്, അര്ജുന് സിങ്, വിജിലേഷ്, മാമുക്കോയ തുടങ്ങിയവരാണ് മറ്റ് അഭിനേതാക്കള്.
ചിത്രം നിര്മ്മിക്കുന്നത് സ്ക്രിപ്റ്റ് ഡോക്ടര് പിക്ചേഴ്സിന്റെ ബാനറില് ദയാപരന് ആണ്. ജുബൈര് മുഹമ്മദ് സംഗീത സംവിധാനം നിര്വഹിച്ചിരിക്കുന്ന ചിത്രത്തിന്റെ ഗാനരചന അന്വര് അലിയും സന്ഫീര്.കെ.യും ചേര്ന്നാണ് നിര്വ്വഹിച്ചിരിക്കുന്നത്.
ഛായാഗ്രഹണം: ഷമീര് ജിബ്രാന്, ചിത്രസംയോജനം: നൗഫല് അബ്ദുള്ള, അസോസിയേറ്റ് ക്യാമറ: ഉണ്ണി പാലോട്, ആര്ട്ട്: ശ്രീജിത്ത് ഓടക്കാലി, പ്രൊജക്ട് ഡിസൈനര്: ബാദുഷ എന്.എം, വസ്ത്രാലങ്കാരം: ജിഷാദ് ഷംസുദ്ദീന്, മേക്കപ്പ്: ഷാജി പുല്പ്പള്ളി, സ്റ്റില്സ് ജിതിന് മധു. മാര്ക്കറ്റിംഗ്: എം.ആര് പ്രൊഫഷണല്, പി.ആര്.ഓ. മഞ്ജു ഗോപിനാഥ്.