അമിത് ചക്കാലക്കല് നായകനാവുന്ന ആക്ഷന് ത്രില്ലര് ‘ജിബൂട്ടി’യുടെ ട്രെയിലര് ആണ് ഇന്ത്യന് സിനിമയുടെ ചരിത്രത്തില് ആദ്യമായി സ്പൈസ് ജെറ്റില് ആകാശത്തു വച്ച് റിലീസ് ചെയ്തത്. ജിബൂട്ടിയുടെ ഹിന്ദി ട്രെയിലറാണ് റിലീസ് ചെയ്തത്. പിന്നീട് അന്ധേരിയിലെ ഫണ് റിപ്പബ്ലിക് മാളില് നടന്ന ചടങ്ങില് സംഗീത സംവിധായകന് സലിം മര്ച്ചന്റ്, ട്രെയിലറിന്റെ ഉദ്ഘാടനം നിര്വഹിക്കുകയും ചെയ്തു. ചിത്രം ഈ വര്ഷം ഡിസംബര് 10ന് തീയേറ്ററിലെത്തുമെന്ന വിവരം ചിത്രത്തിന്റെ അണിയറ പ്രവര്ത്തകര് പുറത്തുവിട്ടു.
ബ്ലൂഹില് നെയ്ല് കമ്മ്യൂണിക്കേഷന്റെ ബാനറില് ആഫ്രിക്കന് രാജ്യമായ ‘ജിബൂട്ടി’യിലെ മലയാളി വ്യവസായി ജോബി. പി. സാം നിര്മ്മിക്കുന്ന ചിത്രം എസ്.ജെ സിനു ആണ് സംവിധാനം ചെയ്യുന്നത്. എസ്. ജെ. സിനുവിന്റെ ആദ്യ ചലച്ചിത്ര സംരംഭമാണ് ‘ജിബൂട്ടി’. ബോളിവുഡ് നടിയായ ശഗുന് ജസ്വാളാണ് അമിത് ചക്കാലക്കലിന്റെ നായികയായി എത്തുന്നത്. ബാലതാരം ബേബി ജോര്ജും ചിത്രത്തില് പ്രധാന വേഷത്തില് എത്തുന്നുണ്ട്.
പ്രണയത്തിനും ആക്ഷനും പ്രാധാന്യം നല്കിക്കൊണ്ടുള്ള ചിത്രത്തിന്റെ ഷൂട്ടിങ് 75 ശതമാനവും പൂര്ത്തിയാക്കിയത് ആഫ്രിക്കയിലെ ജിബൂട്ടിയിലായിരുന്നു. മുന്പ് റിലീസ് ചെയ്ത ചിത്രത്തിന്റെ ട്രൈലറും പോസ്റ്ററുകളും പ്രേക്ഷകര്ക്കിടയില് വലിയ സ്വീകാര്യത ലഭിച്ചിരുന്നു. കൈതപ്രം ദാമോദരന് നമ്പൂതിരി വരികളെഴുതി ശങ്കര് മഹാദേവന്, ബിന്ദു അനിരുദ്ധ് എന്നിവര് ചേര്ന്ന് ആലപിച്ച ‘വിണ്ണിനഴകേ കണ്ണിനിതളേ’ എന്ന റൊമാന്റിക് സോങ്ങും ഹിറ്റ് ചാര്ട്ടില് ഇടം പിടിച്ചിരുന്നു.
അമിത് ചക്കാലക്കലിന് പുറമെ ഗ്രിഗറി, ദിലീഷ് പോത്തന്, ബിജു സോപാനം, സുനില് സുഖദ, തമിഴ് നടന് കിഷോര്,ഗീത, ആതിര, അഞ്ജലി നായര്, രോഹിത് മഗ്ഗു, അലന്സിയര്, പൗളി വത്സന്, മാസ്റ്റര് ഡാവിഞ്ചി തുടങ്ങിയവരും ചിത്രത്തില് അഭിനയിക്കുന്നുണ്ട്. ഗുഡ് വില് എന്റര്ടൈന്മെന്റ്സാണ് ചിത്രം വിതരണത്തിന് എത്തിക്കുന്നത്. തിരക്കഥ, സംഭാഷണം അഫ്സല് അബ്ദുള് ലത്തീഫ് & എസ്. ജെ. സിനു.