ആരാധികയ്ക്ക് സർപ്രൈസ് സമ്മാനമായി ഫോട്ടോ നൽകി ഞെട്ടിച്ച ജയസൂര്യയുടെ വീഡിയോയാണ് സോഷ്യൽ മീഡിയയിൽ വൈറൽ. പനമ്പള്ളിനഗറിലെ ടോണി ആൻഡ് ഗൈ കടയിലെ ഹൗസ്ക്ലീനിംഗ് സ്റ്റാഫ് ആയ പുഷ്പയ്ക്കാണ് ജയസൂര്യ സർപ്രൈസ് സമ്മാനം നൽകിയത്. കടയില്‍ ജയസൂര്യ വരുന്നുണ്ടെന്ന് അറിഞ്ഞപ്പോൾ മുതൽ പുഷ്പ ആകാംക്ഷയിലായിരുന്നു.
അദ്ദേഹത്തെ ഒന്ന് നേരിൽ കാണുക എന്നത് മാത്രമായിരുന്നു പുഷ്പയുടെ മനസ്സിൽ ഉണ്ടായിരുന്നത്. ജയസൂര്യയെ ഒരു നോക്ക് കാണാൻ കാത്തിരുന്ന പുഷ്പയ്ക്ക് ലഭിച്ചത് ഇരട്ടിമധുരമാണ്. പുഷ്പ ചേച്ചി തന്റെ കടുത്ത ആരാധികയാണെന്ന അറിഞ്ഞ ജയസൂര്യ അവരെ പരിചയപ്പെടുകയും സ്വന്തം ഫോണിൽ അവർക്കൊപ്പമൊരു ഫോട്ടോ എടുക്കുകയും ചെയ്തു.
എന്നാൽ ചിത്രം വീട്ടിലുള്ളവരെ കാണിക്കുവാൻ തന്റെ കയ്യിൽ സ്മാർട് ഫോൺ ഇല്ലന്നറിഞ്ഞ താരം മിനിറ്റുകൾക്കുള്ളിൽ ചിത്രം ഫ്രയിം ചെയ്ത് ആരാധികയ്ക്ക് സമ്മാനിക്കുകയായിരുന്നു. സെൽഫി താൻ പോലും അറിയാതെയാണ് താരത്തിന്റെ അസിസ്റ്റന്റിനെ വിട്ട് അപ്പോൾ തന്നെ ഫ്രെയിമിലാക്കി നൽകിയത്.
പുഷ്പയ്ക്ക് സർപ്രൈസ് നൽകുന്ന വീഡിയോയും ഇരുവരുടെയും ചിത്രവും സ്ഥാപനം തങ്ങളുടെ ഔദ്യോഗിക ഇൻസ്റ്റാഗ്രാം പേജിലൂടെ പങ്കുവച്ചിരുന്നു. അദ്ദേഹത്തിന്റെ കാരുണ്യപ്രവൃത്തികളാണ് അദ്ദേഹത്തെ ഓഫ്‌സ്‌ക്രീനിലും നായകനാക്കി മാറ്റുന്നത്. ഞങ്ങളുടെ സ്ഥാപനത്തിലെ പുഷ്പ ചേച്ചിയുടെ മുഖത്ത് ആ വലിയ ചിരി സമ്മാനിച്ചുകൊണ്ട് അവർക്ക് മികച്ച ദിവസം നൽകിയതിന് ജയസൂര്യയ്ക്ക് നന്ദി പറയുന്നു എന്ന അടിക്കുറിപ്പോടെയാണ് സ്ഥാപനം വീഡിയോ പങ്കുവച്ചിരിക്കുന്നത്
