നടന് ജയറാം വീണ്ടും തെലുങ്കില്. ‘ഹനുമാന്’ എന്ന സൂപ്പര് ഹിറ്റിന് ശേഷം നടന് തേജ സജ്ജയുടെതായി എത്തുന്ന പുതിയ ചിത്രത്തിലാണ് ഒരു സന്യാസിയുടെ വേഷത്തില് ജയറാം എത്തുന്നത്. ‘മിറൈ’ എന്ന് പേരിട്ട സിനിമയുടെ ടീസര് ശ്രദ്ധ നേടുകയാണ്. പാന് ഇന്ത്യന് ചിത്രമായി ഒരുക്കുന്ന സിനിമ മലയാളം ഉള്പ്പടെ നാല് ഭാഷകളില് റിലീസിനെത്തും.
ടോളിവുഡിലെ പ്രമുഖ പ്രൊഡക്ഷന് ഹൗസായ പീപ്പിള് മീഡിയ ഫാക്ടറിയുടെ ബാനറില് ടി.ജി. വിശ്വപ്രസാദ് ഗാരുവാണ് നിര്മ്മിക്കുന്നത്. ശ്രിയ ശരണ്, ജഗപതി ബാബു, റിതിക നായക് എന്നിവരാണ് മറ്റ് അഭിനേതാക്കള്. വില്ലനായി മനോജ് മഞ്ജു ആണ് വേഷമിടുന്നത്. എട്ട് വര്ഷത്തെ ഇടവേളയ്ക്ക് ശേഷം മനോജ് അഭിനയിക്കുന്ന ചിത്രം കൂടിയാണിത്.
രവി തേജ ചിത്രം ‘ഈഗിളി’ന് ശേഷം പീപ്പിള് മീഡിയ ഫാക്ടറിയോടൊപ്പം സംവിധായകന് കാര്ത്തിക് ഗട്ടംനേനി ഒരുമിക്കുന്ന രണ്ടാമത്തെ പ്രോജക്ട് ആണിത്. സെപ്റ്റംബര് അഞ്ചിനാണ് ചിത്രത്തിന്റെ റിലീസ്. തിരക്കഥ മണിബാബു കരണമാണ് ഒരുക്കുന്നത്.