മരക്കാര്‍ അറബിക്കടലിന്റെ സിംഹം ചിത്രത്തില്‍ മോഹന്‍ലാലിനൊപ്പം നിന്ന് ആക്ഷന്‍ രംഗങ്ങളില്‍ മികച്ച പ്രകടനം കാഴ്ച വച്ച കാഴ്ചവച്ച നടനാണ് ജയ് ജെ ജക്രീത്. മോഹന്‍ലാല്‍ സംവിധാനം ചെയ്യുന്ന ബറോസിന്റെ സെറ്റില്‍ നിന്നുള്ള ജയ് ജക്രീതിന്റെ പുതിയ ആക്ഷന്‍ വീഡിയോയാണ് ഇപ്പോള്‍ വൈറലാകുന്നത്.
സംവിധായകനും ഛായാഗ്രാഹകനുമായ അനീഷ് ഉപാസനയാണ് വീഡിയോ പങ്കുവച്ചിരിക്കുന്നത്. ചിന്നാലി എന്ന കഥാപാത്രത്തെയാണ് ജയ് ജക്രീത് മരക്കാറില്‍ അവതരിപ്പിച്ചത്. അതേസമയം, മോഹന്‍ലാല്‍ ആദ്യമായി സംവിധായക തൊപ്പിയണിയുന്ന ചിത്രത്തിനായി ഏറെ പ്രതീക്ഷയോടെയാണ് പ്രേക്ഷകര്‍ കാത്തിരിക്കുന്നത്.
വാസ്‌കോഡഗാമയുടെ രത്നങ്ങളുടെയും നിധികളുടെയും കാവല്‍ക്കാരനായ ബറോസിന്റെ കഥയാണ് ചിത്രം പറയുന്നത്. ബറോസ് എന്ന ടൈറ്റില്‍ റോളില്‍ എത്തുന്നത് മോഹന്‍ലാല്‍ തന്നെയാണ്. സ്പാനിഷ് അഭിനേത്രി പാസ് വേഗ, സ്പാനിഷ് നടന്‍ റാഫേല്‍ അമര്‍ഗോ എന്നിവര്‍ പ്രധാന കഥാപാത്രമായി സിനിമയിലുണ്ടാകും.
വാസ്‌കോഡഗാമയുടെ റോളിലാണ് റഫേല്‍ അമര്‍ഗോ അഭിനയിക്കുന്നത്. വാസ്‌കോഡഗാമയുടെ ഭാര്യയുടെ റോളിലാണ് പാസ് വേഗ. നടന്‍ ഗുരു സോമസുന്ദരവും ഒരു പ്രധാനപ്പെട്ട റോളില്‍ ചിത്രത്തിലെത്തുന്നുണ്ട്. ആശിര്‍വാദ് സിനിമാസിന്റെ ബാനറില്‍ ആന്റണി പെരുമ്പാവൂരാണ് ചിത്രം നിര്‍മിക്കുന്നത്.