ടൊവിനോ തോമസ് നായകനാവുന്ന കിലോമീറ്റേഴ്സ് ആന്ഡ് കിലോമീറ്റേഴ്സ് റിലീസിന് തയ്യാറെടുക്കുകയാണ്. ചിത്രത്തിന്റെ ട്രെയിലര് കഴിഞ്ഞ ദിവസം റിലീസ് ചെയ്തിരുന്നു. രസകരമായ ഒരു റോഡ് മൂവിയാണ് ചിത്രമെന്നാണ് ട്രെയിലര് വ്യക്തമാക്കുന്നത്. ട്രെയിലര് ഇതിനോടകം ശ്രദ്ധ നേടിക്കഴിഞ്ഞു. ഇപ്പോഴിതാ ട്രെയിലര് ഷെയര് ചെയ്ത് ട്വീറ്റുമായി എത്തിയിരിക്കുകയാണ് മുന് ക്രിക്കറ്റ് താരം ഇര്ഫാന് പത്താന്.
“ഒരു ദിവസം ഞാന് പോകാന് ആഗ്രഹിക്കുന്ന ഒരു റോഡ് യാത്രയാണിത്. ഹെല്മറ്റ് ഉപയോഗിച്ച് നിങ്ങളെപോലെ സുരക്ഷിതമായി.” എന്നാണ് ട്രെയിലര് പങ്കുവെച്ച് ഇര്ഫാന് പത്താന് ട്വീറ്റ് ചെയ്തിരിക്കുന്നത്. ടൊവീനോയെ ടാഗ് ചെയ്താണ് പത്താന്റെ ട്വീറ്റ്. പത്താന് നന്ദിയറിച്ച് ടൊവീനോയും രംഗത്ത് വന്നു.
ബുള്ളറ്റില് ഇന്ത്യ മുഴുവനും ചുറ്റി സഞ്ചരിക്കണമെന്ന മോഹവുമായി അമേരിക്കയില് നിന്ന് എത്തുന്ന കാതറിന് എന്ന വിദേശ വനിതയുടെ കഥയാണ് കിലോമീറ്റേഴ്സ് ആന്റ് കിലോമീറ്റേഴ്സ്. കാതറിനായി ഇന്ത്യ ജാര്വിനാണ് വേഷമിടുന്നത്. കാതറിനെ സഹായിക്കാനെത്തുന്ന ജോസ് മോന് എന്ന കഥാപാത്രമാണ് ടോവിനോയുടേത്. ജിയോ ബേബി സംവിധാനം ചെയ്യുന്ന ചിത്രം ടൊവിനോക്കൊപ്പം റംഷി അഹമ്മദ്, ആന്റോ ജോസഫ്, സിനു സിദ്ധാര്ഥ് എന്നിവര് ചേര്ന്നാണ് നിര്മ്മിക്കുന്നത്. “2 പെണ്കുട്ടികള്”, “കുഞ്ഞുദൈവം” തുടങ്ങിയ ചിത്രങ്ങളുടെ സംവിധായകനാണ് ജിയോ ബേബി. മാര്ച്ച് 12ന് ചിത്രം ലോകമെമ്പാടും റിലീസ് ചെയ്യും.