ജോജു ജോര്ജിനെയും നിമിഷ സജയനെയും കേന്ദ്രകഥാപാത്രങ്ങളാക്കി സനല് കുമാര് ശശിധരന് ഒരുക്കിയ ചോല തിയേറ്ററുകളില് മികച്ച പ്രതികരണം നേടി മുന്നേറുന്നു. ആണത്തമില്ലാത്ത ആണ്കുട്ടികളെ പ്രണയിക്കുന്ന പെണ്കുട്ടികള് കണ്ടിരിക്കേണ്ട ചിത്രമെന്നാണ് ചോലയെ കുറിച്ചുള്ള പ്രേക്ഷക പ്രതികരണം.
ചോലയെക്കുറിച്ചു വരുന്ന റിവ്യൂകള് മനം കുളിര്പ്പിക്കുന്നുണ്ടെന്നാണ് സംവിധായകന് സനല് കുമാര് ഫെയ്സ്ബുക്കില് കുറിച്ചത്. “പക്ഷേ സിനിമ, പ്രത്യേകിച്ചും തിയേറ്ററില് വരുന്ന സിനിമ പണം കത്തുന്ന കലയാണ്. സിനിമ നല്ലതെങ്കില് തിയേറ്ററില് പോയി തന്നെ കാണണം. സിനിമകാണണമെന്ന് സുഹൃത്തുക്കളോട് പറയണം. ചോല തിയേറ്ററില് എക്സ്പീരിയന്സ് ചെയ്യേണ്ട സിനിമയാണ്.” സനല് കുമാര് കുറിപ്പില് പറഞ്ഞു.
ആണ്കുട്ടിയ്ക്കൊപ്പം ഒളിച്ചോടിയ പെണ്കുട്ടിക്ക് പിന്നീട് സംഭവിക്കുന്ന കാര്യങ്ങളെ കുറിച്ച് വളരെ വൈകാരികമായി പറഞ്ഞ് പോകുന്ന സിനിമയാണ് ചോല. നാട്ടിന് പുറത്ത് താമസിക്കുന്ന പെണ്കുട്ടി എറണാകുളം കാണാന് കാമുകനൊപ്പം ഇറങ്ങിത്തിരിക്കുകയും പിന്നീട് ഉള്ള രണ്ടു ദിവസങ്ങള് ആ കുട്ടിയുടെ ജീവിതത്തില് സംഭവിക്കുന്ന കാര്യങ്ങളുമാണ് ചോല പറയുന്നത്.