സിനിമാ സമരം നടത്തുമെന്ന നിലപാടില് ഉറച്ച് ഫിലിം ചേംബര്. മറ്റ് സംഘടനകള് സഹകരിച്ചില്ലെങ്കിലും സമരം നടത്തുമെന്ന് ഫിലിം ചേംബര് ഇന്ന് ചേര്ന്ന യോഗത്തില് തീരുമാനമായി. സൂചനാ പണിമുടക്ക് നടത്തും. തിയതി പിന്നീട് അറിയിക്കും എന്നാണ് ഫിലിം ചേംബര് തീരുമാനിച്ചിരിക്കുന്നത്. മാത്രമല്ല, നിര്മ്മാതാവ് ആന്റണി പെരുമ്പാവൂരിന് നോട്ടീസ് നല്കുമെന്നും ഫിലിം ചേംബര് അറിയിച്ചു.
ആന്റണിയുടെ പ്രസ്താവന ശരിയായില്ല. ആന്റണിക്കെതിരെ നടപടി എടുക്കണമെന്നും ഫെയ്സ്ബുക്ക് പോസ്റ്റ് പിന്വലിക്കണമെന്നുമുള്ള ആവശ്യങ്ങള് ഫിലിം ചേംബറിന്റെ യോഗത്തില് ഉയര്ന്നു. ജി സുരേഷ് കുമാര് പറഞ്ഞത് സംഘടനയുടെ കൂട്ടായ തീരുമാനമാണെന്നും ഫിലിം ചേംബര് വ്യക്തമാക്കി.
അതേസമയം, ഫിലിം ചേംബറിന്റെ ആവശ്യങ്ങള് അംഗീകരിക്കില്ലെന്ന നിലപാടാണ് താരസംഘടനയായ ‘അമ്മ’ എടുത്തിരിക്കുന്നത്. നിര്മ്മാതാക്കള് നടത്താനിരിക്കുന്ന സിനിമാ സമരം എന്ന തീരുമാനം അംഗീകരിക്കാനാവില്ല എന്നും അമ്മ ഇന്ന് ചേര്ന്ന യോഗത്തില് തീരുമാനമായി.
അഭിനേതാക്കള് സിനിമയില് അഭിനയിക്കുന്നതും നിര്മ്മിക്കുന്നതിലും നിര്മ്മാതാക്കളുടെ സംഘടന ഇടപെടുന്നത് അംഗീകരിക്കാന് കഴിയില്ലെന്നും സംഘടന വ്യക്തമാക്കി. ഇന്ന് രാവിലെ ചേര്ന്ന യേഗത്തിന് പിന്നാലെയാണ് അമ്മ തീരമാനം അറിയിച്ചത്.