സല്‍മാന്‍ ഖാന്‍ നായകനായ ബ്ലോക്ബസ്റ്റര്‍ ചിത്രം ഭജ് രംഗി ഭായ്ജാന്‍ ചൈനയിലെ 8000 ത്തിലധികം തീയേറ്ററുകളില്‍ റിലീസ് ചെയ്യുന്നു. മാര്‍ച്ച് 2നാണ് ചൈനീസ് ലാന്റേണ്‍ ഫെസ്റ്റിവലില്‍ ചിത്രം റിലീസ് ചെയ്യുന്നതെന്ന് ചിത്രത്തിന്റെ നിര്‍മ്മാതാക്കളായ ഇറോസ് ഇന്റര്‍നാഷണല്‍ സ്ഥിരീകരിച്ചു.
ഇ- സ്റ്റാര്‍സുമായി സഹകരിയ്ക്കാന്‍ സാധിച്ചതിലും ഞങ്ങളുടെ ചിത്രം ചൈനയില്‍ പ്രദര്‍ശിപ്പിക്കാന്‍ കഴിഞ്ഞതിലും സന്തോഷമുണ്ടെന്ന് , ഇറോസ് ഇന്റര്‍ നാഷണിന്റെ സിഇഒ ജ്യോതി ദേശ് പാണ്ഡേ വ്യക്തമാക്കി. കബീര്‍ ഖാന്‍ സംവിധാനം ചെയ്ത ഈ ചിത്രത്തില്‍ പാകിസ്താനി പെണ്‍കുട്ടിയെ തന്റെ മാതാപിതാക്കളെ കണ്ടെത്താന്‍ സഹായിക്കുന്ന ചെറുപ്പക്കാരന്റെ വേഷത്തിലാണ് സല്‍മാന്‍ എത്തുന്നത്.
സല്‍മാനു പുറമേ കരീന കപൂര്‍, നവാസുദ്ദീന്‍ സിദ്ദിഖി, ഹര്‍ഷാലി മല്‍ഹോത്ര, അദ്‌നാന്‍ സാമി എന്നിവരും ചിത്രത്തില്‍ പ്രധാനവേഷങ്ങളിലെത്തുന്നു. 2015ജൂലൈയില്‍ എത്തിയ ചിത്രം ഇന്ത്യയില്‍ 4,200 തീയേറ്ററുകളിലും അന്താരാഷ്ട്രതലത്തില്‍ 700 സ്‌ക്രീനുകളിലും റിലീസ് ചെയ്തിരുന്നു.