നെറ്റ്ഫ്‌ളിക്‌സ് ഇന്ത്യയുടെ ദുല്‍ഖര്‍ സല്‍മാനെ കുറിച്ചുള്ള ട്വീറ്റാണ് സോഷ്യല്‍ മീഡിയയില്‍ ചര്‍ച്ചയാകുന്നത്. “”ദുല്‍ഖര്‍ പുലിയാഡാ”” എന്ന ട്വീറ്റ് നെറ്റ്ഫ്‌ളിക്‌സിന്റെ മാന്‍ ക്രഷ് മണ്‍ഡേ (#MCM) എന്ന ഹാഷ്ടാഗില്‍ എത്തിയതാണ് ആരാധകരുടെ ആകാംക്ഷ വര്‍ദ്ധിപ്പിച്ചിരിക്കുന്നത്. ദുല്‍ഖറിന്റെ ഏതെങ്കിലും പുതിയ ചിത്രം നെറ്റ്ഫ്‌ളിക്‌സില്‍ റിലീസിനെത്തുന്നുണ്ടോ എന്നാണ് ആരാധകര്‍ക്ക് അറിയേണ്ടത്.
ചിത്രീകരണം പൂര്‍ത്തിയായ “കുറുപ്പ്” ഒ.ടി.ടി റിലീസ് ചെയ്‌തേക്കാമെന്ന റിപ്പോര്‍ട്ടുകള്‍ നേരത്തെ പ്രചരിച്ചിരുന്നു. കാര്യം എന്താണെന്ന് അറിയാനുള്ള ആകാംക്ഷയിലാണ് ആരാധകര്‍. രസകരമായ കമന്റുകളാണ് നെറ്റ്ഫ്‌ളിക്‌സിന്റെ ഈ ട്വീറ്റിന് ലഭിക്കുന്നത്.
“”ദുല്‍ഖര്‍ സല്‍മാന്‍ പുലിയാണെന്നത് ഓകെ. എന്നാല്‍ കുറുപ്പ് തിയേറ്ററില്‍ എത്തുന്നതിന് മുമ്പ് സ്ട്രീമിംഗ് ആരംഭിക്കരുത്””, “”കുറുപ്പിനെ കുറിച്ചുള്ള അപ്‌ഡേഷന്‍ ആണോ ഇത്?”” എന്നിങ്ങനെയാണ് ചില കമന്റുകള്‍. “”മലയാളം ഒക്കെ അറിയുമോ”” എന്ന ഒരു കമന്റിന് “”പിന്നെ, മലയാളം അറിയാം”” എന്ന മറുപടിയും നെറ്റ്ഫ്‌ളിക്‌സിന്റെ അക്കൗണ്ടില്‍ നിന്നും വന്നിട്ടുണ്ട്.
ശ്രീനാഥ് രാജേന്ദ്രന്‍ സംവിധാനം ചെയ്യുന്ന കുറുപ്പ് ദുല്‍ഖറിന്റെ കരിയറിലെ തന്നെ ഏറ്റവും വലിയ ബജറ്റില്‍ ഒരുങ്ങുന്നത്. 35 കോടിയാണ് ചിത്രത്തിന്റെ മുടക്കുമുതല്‍. ദുല്‍ഖറിന്റെ ഉടമസ്ഥതയിലുള്ള വേഫറെര്‍ ഫിലിംസും എം സ്റ്റാര്‍ എന്റര്‍ടൈന്‍മെന്റ്സും ചേര്‍ന്നാണ് നിര്‍മ്മാണം. കേരളത്തിലെ കുപ്രസിദ്ധ പിടികിട്ടാപ്പുള്ളി സുകുമാരക്കുറുപ്പിന്റെ ജീവിതത്തെ ആസ്പദമാക്കിയാണ് ചിത്രം ഒരുങ്ങുന്നത്.