മെഗാസ്റ്റാര്‍ മമ്മുട്ടിക്ക് കാറുകളോടുള്ള താല്‍പ്പര്യം സിനിമാ ലോകത്തും പുറത്തും ഏറെ ശ്രദ്ധനേടിയ സംഗതിയാണ്. മികച്ച വാഹനങ്ങള്‍ സ്വന്തമാക്കുന്നതിന് താന്‍ മടികാണിക്കാറില്ലെന്ന് മമ്മുട്ടി തന്നെ വ്യക്തമാക്കിയതുമാണ്. എന്നാല്‍, പിതാവിന്റെ അതേ വഴിയില്‍ തന്നെയാണ് മകന്‍ ദുല്‍ഖര്‍ സല്‍മാനും. ഈയടുത്ത് തുരുമ്പെടുത്ത ഒരു പഴയ ബെന്‍സ് കാര്‍ നന്നാക്കിയെടുത്ത് ഉപയോഗിക്കാന്‍ തുടങ്ങിയെന്ന് ദുല്‍ഖര്‍ സോഷ്യല്‍ മീഡിയയില്‍ പങ്കുവെച്ചതോടെയാണ് മമ്മുട്ടിയുടെ വഴിയെ തന്നെയാണ് മകനെന്നും ആരാധകര്‍ക്ക് വ്യക്തമായത്.
ഇതിന് പുതിയ ഒരു ഉദാഹരണം കൂടി ലഭിച്ചിരിക്കുകയാണ്. ഇത്തവണ പഴയതൊന്നും അല്ല. പുത്തന്‍ പുതിയത്. ജര്‍മന്‍ കമ്പനി ഫോക്‌സ്‌വാഗണിന്റെ ഉടമസ്ഥതയിലുള്ള പോര്‍ഷെയുടെ പാനമീറ ടര്‍ബോയാണ് ദുല്‍ഖര്‍ സ്വന്തമാക്കിയിരിക്കുന്നത്. രണ്ട് കോടിയോളം രൂപയാണ് ഇന്ത്യന്‍ വിപണിയില്‍ ഈ കാറിന് വില. പോര്‍ഷെയുടെ രണ്ടാം തലമുറ സ്‌പോര്‍ട്‌സ് സലൂണ്‍ 4 ലിറ്റര്‍ ട്വിന്‍ ടര്‍ബോ വി8 പെട്രോള്‍ എന്‍ജിനാണ് പാനമീറ ടര്‍ബോയില്‍ ഉപയോഗിച്ചിരിക്കുന്നത്. ലോകത്തെ മികച്ച സ്‌പോര്‍ട്‌സ് കാറുകളുടെ നിരയില്‍പ്പെടുന്ന മോഡലാണ് ഡിക്യു സ്വന്തമാക്കിയിരിക്കുന്നത്.
നീല നിറത്തിലുള്ള പോര്‍ഷെ പാനമീറ ഡിക്യുവിന്റെ ഗ്യാരേജില്‍ ഇനി തലയെടുപ്പോടെ ഇരിക്കും. മൈലേജും കാര്യങ്ങളൊന്നും സ്‌പോര്‍ട്‌സ് കാറുകള്‍ക്ക് ചോദിക്കരുത്. 550 എച്ച്പിയാണ് എന്‍ജിന്‍ കരുത്ത്. പ്യൂജ്യത്തില്‍ നിന്നും 100 കിലോമീറ്റര്‍ വേഗതയിലെത്താന്‍ ഈ കാറിന് വേണ്ടത് കേവലം 3.8 സെക്കന്‍ഡ്. മണിക്കൂറില്‍ പരമാവധി വേഗതയാകട്ടെ 306 കിലോമീറ്ററും. എന്തായാലും ആരാധകര്‍ ഇതോടെ ഒരു കാര്യം ഉറപ്പിച്ചു. കാര്‍ കളക്ഷനില്‍ മമ്മുട്ടിക്കു മകന്‍ ശക്തമായ വെല്ലുവിളി ഉയര്‍ത്തുമെന്ന്.
https://www.facebook.com/Basil.P.Elias/posts/10155996698699106