കേവലം ആറ് സിനിമകൾ കൊണ്ട് മലയാളത്തിൽ തന്റേതായ സ്ഥാനം ഉണ്ടാക്കിയെടുത്ത സ്വതന്ത്ര സംവിധായകനാണ് ഡോൺ പാലത്തറ. കച്ചവട- വാണിജ്യ ചിത്രങ്ങൾക്കപ്പുറത്ത് സിനിമ എന്ന മാധ്യമത്തെ നിരന്തരം നവീകരിക്കുകയും നൂതനമായ ആഖ്യാനശൈലിയിൽ പുത്തൻ പരീക്ഷണങ്ങൾ നടത്തുന്നതിൽ ഡോൺ പാലത്തറ എന്ന സംവിധായകൻ എന്നും വിജയിച്ചിട്ടുണ്ട്.
ഡോൺ പാലത്തറ
ശവം, വിത്ത്, 1956 മധ്യ തിരുവിതാംകൂർ, എവരിത്തിങ് ഈസ് സിനിമ, സന്തോഷത്തിന്റെ ഒന്നാം രഹസ്യം, ഫാമിലി തുടങ്ങീ ആറ് സിനിമകൾ മാത്രം മതി ഡോൺ പാലത്തറ എന്ന പ്രതിഭയെ അടയാളപ്പെടുത്താൻ.
ഇപ്പോഴിതാ ഡോണിന്റെ ഏറ്റവും കൂടുതൽ നിരൂപക പ്രശംസകൾ നേടിയ ‘1956 മധ്യ തിരുവിതാംകൂർ’ എന്ന ചിത്രം സ്ട്രീമിംഗിന് ഒരുങ്ങുന്നു. നേരത്തെ ലോക സിനിമ സ്ട്രീമിംഗ് പ്ലാറ്റ്ഫോമായ മുബിയിൽ ചിത്രം പ്രദർശിപ്പിച്ചിരുന്നു. യൂട്യൂബിലൂടെ സിനിമ പ്രേക്ഷകർക്ക് സൗജന്യമായി ചിത്രം കാണാൻ സാധിക്കും. ഡിസംബര് 4 ന് മലയാളത്തിലെ പ്രമുഖ നിര്മ്മാണ കമ്പനിയായ ഭാവന സ്റ്റുഡിയോസിന്റെ യുട്യൂബ് ചാനലിലൂടെ ചിത്രം സ്ട്രീമിംഗ് ആരംഭിക്കും.
ഭൂപരിഷ്കരണത്തിനും മുന്നേ ഇടുക്കിയിലും മറ്റും നടന്ന വ്യാപകമായ കുടിയേറ്റത്തിന്റെ പശ്ചാത്തലത്തിൽ, പ്രകൃതിയും മനുഷ്യനും ആയും മനുഷ്യനും മനുഷ്യനും തമ്മിലും നിരന്തരമായ് ഉണ്ടാവുന്ന ഭൗതികവും ആന്തരികവുമായ സംഘർഷങ്ങൾ വേട്ടയ്ക്ക് പോകുന്ന ഒരു പറ്റം പുരുഷന്മാരിലൂടെ ഒരു കഥയായി ആവിഷ്കരിച്ചിരിക്കുന്നു. ബ്ലാക്ക് ആന്റ് വൈറ്റിൽ ചിത്രീകരിച്ച സിനിമ മലയാള സിനിമ ചരിത്രത്തിലെ മികച്ച സൃഷ്ടി തന്നെയാണ്. ആസിഫ് യോഗി, ജെയിന് ആന്ഡ്രൂസ്, കൃഷ്ണന് ബാലകൃഷ്ണന്, കനി കുസൃതി, ഷോണ് റോമി എന്നിവരാണ് ചിത്രത്തിലെ പ്രധാന കഥാപാത്രങ്ങൾ.
ബുസാൻ ഇന്റർനാഷണൽ ഫിലിം ഫെസ്റ്റിവൽ, മോസ്കോ ഇന്റർനാഷണൽ ഫിലിം ഫെസ്റ്റിവൽ തുടങ്ങീ നിരവധി അന്താരാഷ്ട്ര ഫിലിം ഫെസ്റ്റിവലുകളിൽ മികച്ച പ്രതികരണം ലഭിച്ച സിനിമയാണ് 1956 മധ്യ തിരുവിതാംകൂർ. ഡോൺ പാലത്തറയുടെ ‘ഫാമിലി’ എന്ന ചിത്രം ഈ വർഷത്തെ കേരള രാജ്യാന്തര ഫിലിം ഫെസ്റ്റിവലിൽ അന്താരാഷ്ട്ര മത്സരവിഭാഗത്തിലുണ്ട്.