ക്രിസ്മസിന് പ്രേക്ഷകരുടെ മുന്നിലേക്ക് സാന്റാക്ലോസ് ആയി ദിലീപ് വരുന്നു. സുഗീത് സംവിധാനം ചെയ്യുന്ന “മൈ സാന്റാ”യില് സാന്റാക്ലോസിന്റെ വേഷത്തിലാണ് ദിലീപ് പ്രത്യക്ഷപ്പെടുന്നത്. ദിലീപിന്റെ സാന്റാ കഥാപാത്രവും ഒരു കുട്ടിയും തമ്മിലുള്ള ബന്ധത്തിന്റെ കഥയാണ് മൈ സാന്റാ. ചിത്രത്തിന്റെ ട്രെയിലര് ഇതിനകം തന്നെ സോഷ്യല് മീഡിയയില് ഏറെ ശ്രദ്ധ നേടിക്കഴിഞ്ഞു. ക്രിസ്മസിന് കുടുംബത്തോടൊപ്പം തിയേറ്ററില് പോയി ആസ്വദിക്കാന് കഴിയുന്ന ഒരു നല്ല ചിത്രമായിരിക്കും ഇതെന്ന ഉറപ്പാണ് ട്രെയിലര് നല്കുന്നത്.
ദിലീപിനോടൊപ്പം സണ്ണി വെയ്ന്, ഷൈന് ടോം ചാക്കോ, സായ് കുമാര്, സിദ്ധിഖ്, കലാഭവന് ഷാജോണ്, സുരേഷ് കൃഷ്ണ, സാദ്ദിഖ്, ഇര്ഷാദ്, ഇന്ദ്രന്സ്, ധര്മ്മജന് ബോള്ഗാട്ടി, ശശാങ്കന്, ധീരജ് രത്നം, അനുശ്രീ, മഞ്ജു പത്രോസ്, ബേബി മാനസ്വി, ബേബി ദേവനന്ദ തുടങ്ങിയവരും അഭിനയിക്കുന്നു. അനുശ്രീയാണ് ചിത്രത്തില് നായിക. ചന്ദ്രേട്ടന് എവിടെയാ എന്ന ചിത്രത്തിന് ശേഷം ഇരുവരും ഒന്നിക്കുന്ന ചിത്രമാണിത്.
വാള് പോസ്റ്റര് എന്റര്ടൈയ്ന്മെന്റ്സിന്റെ ബാനറില് നിഷാദ് കോയ, അജീഷ് ഒ കെ, സരിത സുഗീത് എന്നിവര് ചേര്ന്ന് നിര്മ്മിക്കുന്ന ഈ ചിത്രത്തിന്റെ തിരക്കഥ, സംഭാഷണം ജെമിന് സിറിയക് ആണ് നിര്വ്വഹിച്ചിരിക്കുന്നത്. ഫൈസല് അലി ഛായാഗ്രഹണം നിര്വ്വഹിക്കുന്നു. സന്തോഷ് വര്മ്മ, നിഷാദ് അഹമ്മദ് എന്നിവരുടെ വരികള്ക്ക് വിദ്യാസാഗര് സംഗീതം പകരുന്നു. ഡിസംബര് 19 ന് ചിത്രം തിയേറ്ററുകളിലെത്തും.