ദിലീപിനെ നായകനാക്കി എസ്.എല് പുരം ജയസൂര്യ സംവിധാനം ചെയ്യുന്ന ജാക്ക് ഡാനിയലിന്റെ റിലീസ് തിയതി പ്രഖ്യാപിച്ചു. ചിത്രം നവംബര് 14 ന് തിയേറ്ററുകളിലെത്തും. ആക്ഷന് കിങ് അര്ജുന് സര്ജ ചിത്രത്തില് മുഖ്യ വേഷത്തിലെത്തുന്നു എന്നത് ചിത്രത്തെ ശ്രദ്ധേയമാക്കുന്നു. 2007ല് പുറത്തിറങ്ങിയ സ്പീഡ് ട്രാക്ക് എന്ന ചിത്രത്തിന് ശേഷം ദിലീപും എസ്.എല് പുരം ജയസൂര്യയും ഒരുമിക്കുന്ന ചിത്രം കൂടിയാണിത്.
ഞാന് പ്രകാശന് എന്ന ചിത്രത്തിലൂടെ മലയാളികള്ക്ക് സുപരിചിതയായ അഞ്ജു കുര്യനാണ് ചിത്രത്തില് ദിലീപിന്റെ നായികയായെത്തുന്നത്. അജു വര്ഗ്ഗീസ് ദേവന്, സൈജു കുറുപ്പ് തുടങ്ങിയവരും പ്രധാന കഥാപാത്രങ്ങളെ അവതരിപ്പിക്കുന്നു. തമീന്സ് ഫിലിംസിന്റെ ബാനറില് ഷിബു തമീന്സ് ആണ് ചിത്രം നിര്മ്മിക്കുന്നത്.
ആക്ഷന് പ്രാധാന്യമുള്ള സിനിമയില് പീറ്റര് ഹെയ്ന്, കനല് കണ്ണന്, സുപ്രീം സുന്ദര് എന്നിവര് ചേര്ന്നാണ് സ്റ്റണ്ട് കൊറിയോഗ്രഫി നിര്വ്വഹിച്ചിരിക്കുന്നത്. ഛായാഗ്രഹണം ശിവകുമാര് വിജയന്. ഷാന് റഹമാനും ഗോപി സുന്ദറും ചേര്ന്നാണ് ചിത്രത്തിന് വേണ്ടി ഗാനങ്ങള് ചിട്ടപ്പെടുത്തിയിരിക്കുന്നത്.