ടൈറ്റാനിക് ദുരന്തത്തെ ആസ്പദമാക്കി ജെയിംസ് കാമറൂൺ സംവിധാനം ചെയ്ത വിഖ്യാത ചിത്രമാണ് ‘ടൈറ്റാനിക്’. ചിത്രത്തിലൂടെ ജാക്കിന്റെയും റോസിന്റെയും പ്രണയകഥയും ടൈറ്റാനികിന് സംഭവിച്ച ദുരന്തവും ലോകമറിഞ്ഞു. ഇന്നും സിനിമ പ്രേമികളുടെ ഇഷ്ടചിത്രങ്ങളുടെ കൂട്ടത്തിൽ ടൈറ്റാനിക് ഉണ്ട്.
ചിത്രത്തിലൂടെ ജാക്കിനെയും റോസിനെയും അവതരിപ്പിച്ച ലിയൊണാർഡോ ഡി കാപ്രിയോയും കേറ്റ് വിൻസ്ലെറ്റും സിനിമ പ്രേമികളുടെ ഇഷ്ടതാരങ്ങളായി മാറിയിരുന്നു. പിന്നീടും ഒരുപാട് സിനിമകളിൽ ഈ ഇഷ്ടജോടി ഒരുമിച്ചെങ്കിലും ടൈറ്റാനിക് തന്നെയാണ് ഇന്നും മുന്നിൽ നിൽക്കുന്നത്.
ഇപ്പോഴിതാ ചിത്രത്തിൽ ഡി കാപ്രിയോ ധരിച്ച വസ്ത്രം ലേലത്തിന് വെച്ചിരിക്കുകയാണ്. സിനിമ, ടെലിവിഷൻ രംഗത്തെ പ്രശസ്തമായ വസ്തുക്കൾ ലേലം ചെയ്യുന്ന പരിപാടിയുടെ ഭാഗമായാണ് ഇപ്പോൾ ജാക്കിന്റെ വസ്ത്രം ലേലത്തിന് വെച്ചിരിക്കുന്നത്. ജാക്കിന്റെ വസ്ത്രം കൂടാതെ രണ്ടായിരത്തോളം വസ്തുക്കളാണ് ലേലത്തിൽ വെച്ചിരിക്കുന്നത്. ഡികാപ്രിയോ ധരിച്ച പാന്റ്സും കോളർ ഇല്ലാത്ത വെള്ള ഷർട്ടും ചാർക്കോൾ വെസ്റ്റുമാണ് ലേലം ചെയ്യാനൊരുങ്ങുന്നത്. 2 കോടിയോളം രൂപയാണ് വസ്ത്രത്തിന് വില പ്രതീക്ഷിക്കുന്നത്. നവംബർ 9 മുതൽ 12 വരെ ലണ്ടനിൽ വെച്ചാണ് ലേലം നടക്കുന്നത്.
വിഖ്യാത സംവിധായകൻ സ്റ്റാൻലി കുബ്രികിന്റെ കൈപ്പടയിലെഴുതിയ ‘ഷൈനിങ്’ സിനിമയുടെ തിരക്കഥ, ‘ഗോഡ്ഫാദർ’ സിനിമയിൽ മർലൻ ബ്രാൻഡോ ധരിച്ച കോട്ട്, ‘പൈറേറ്റ്സ് ഓഫ് കരീബിയൻ’ സിനിമയിലെ ആക്ഷൻ രംഗങ്ങളിൽ ജോണി ഡെപ്പ് ധരിച്ച വസ്ത്രങ്ങൾ എന്നിവയും ലേലത്തിന്റെ ഭാഗമായി വിൽപ്പനയ്ക്കുണ്ട്.