ധ്യാന്‍ ശ്രീനിവാസന്റെ പുത്തന്‍ ലുക്ക് വൈറല്‍. തടി കുറച്ച് ഒരു പരസ്യത്തില്‍ എത്തിയ താരത്തിന്റെ മേക്കോവര്‍ ആണ് ഇപ്പോള്‍ വൈറലായി കൊണ്ടിരിക്കുന്നത്. ഒരുമാസം കൊണ്ട് ഇത്രയധികം വണ്ണു കുറച്ച ധ്യാനിന്റെ കണ്ട് ആരാധകരും അദ്ഭുതപ്പെട്ടു. ഏത് സിനിമയ്ക്ക് വേണ്ടിയാണ് ധ്യാന്‍ തടി കുറച്ചത് എന്നാണ് ആരാധകരുടെ ചോദ്യം.
തടി കുറയ്ക്കാനും വ്യായാമം ചെയ്യാനും പൊതുവെ തനിക്ക് മടിയാണെന്ന് പല അഭിമുഖങ്ങളിലും ധ്യാന്‍ പറഞ്ഞിട്ടുണ്ട്. വിനീത് ശ്രീനിവാസന്‍ സംവിധാനം ചെയ്യുന്ന ‘വര്‍ഷങ്ങള്‍ക്ക് ശേഷം’ എന്ന ചിത്രത്തിന് വേണ്ടിയാണ് ധ്യാന്‍ തടി കുറച്ചത് എന്ന പ്രചാരണങ്ങളും ഇപ്പോള്‍ എത്തുന്നുണ്ട്.
പ്രണവ് മോഹന്‍ലാലിനെ നായകനാക്കി ഒരുക്കുന്ന വര്‍ഷങ്ങള്‍ക്ക് ശേഷം ചിത്രത്തില്‍ ധ്യാന്‍ ഒരു പ്രധാന വേഷത്തിലെത്തുന്നുണ്ട്. അജു വര്‍ഗീസ്, കല്യാണി പ്രിയദര്‍ശന്‍, ബേസില്‍ ജോസഫ്, നീരജ് മാധവ്, നീത പിള്ള, അര്‍ജുന്‍ ലാല്‍, നിഖില്‍ നായര്‍, ഷാന്‍ റഹ്‌മാന്‍, നിവിന്‍ പോളി എന്നിവരും ചിത്രത്തിന്റെ ഭാഗമാകുന്നുണ്ട്.
അതേസമയം, സ്വന്തം ചേട്ടന് വേണ്ടി തടി കുറയ്ക്കുക മാത്രമല്ല എന്ത് വേണമെങ്കിലും ചെയ്യുമെന്ന നിലപാടിലാണ് ധ്യാന്‍ എന്ന കമന്റുകളാണ് വീഡിയോക്ക് താഴെ എത്തുന്നത്. അതോ ‘അടി കപ്യാരേ കൂട്ടമണി 2’ എന്ന ചിത്രത്തിന്റെ ലുക്ക് ആണോ ഇത് എന്നും ആരാധകര്‍ ചോദിക്കുന്നുണ്ട്.
മൂന്ന് സിനിമകളാണ് ഈ വര്‍ഷം ധ്യാന്‍ ശ്രീനിവാസന്‍ നായകനായി അഭിനയിച്ച് തിയറ്ററുകളിലെത്തിയത്. നദികളില്‍ സുന്ദരി യമുനയാണ് അവസാനം റിലീസ് ചെയ്ത ചിത്രം. ഈ സിനിമയിലും ശരീരഭാരത്തിന്റെ പേരില്‍ ധ്യാന്‍ വിമര്‍ശിക്കപ്പെട്ടിരുന്നു.