ഒമര് ലുലു ചിത്രം ധമാക്കയിലെ മൂന്നാമത്തെ ഗാനം പുറത്തിറങ്ങി. “കണ്ടിട്ടും കാണാത്ത” എന്നാരംഭിക്കുന്ന “മായാവി കുട്ടൂസന്” ഗാനത്തിന്റെ ലിറിക്കല് വീഡിയോയാണ് റിലീസ് ചെയ്തത്. ഈ ഗാനത്തിലൂടെ ബ്ലെസ്ലി എന്ന ഒരു പുതിയ ഗായകനെ ഒമര് ലുലു പരിചയപ്പെടുത്തിയിരിക്കുകയാണ്. ബ്ലെസ്ലീയുടെ ട്രിബ്യൂട്ട് ടു കലാഭവന് മണി എന്ന ഗാനം ഏരെ ശ്രദ്ധിക്കപ്പെട്ടിരുന്നു. മികച്ച സ്വീകാര്യതയാണ് മായാവി കുട്ടൂസന് ഗാനത്തിന് സോഷ്യല് മീഡിയയില് ലഭിച്ചിരിക്കുന്നത്. ബ്ലെസ്ലീയുടെ വരികള്ക്ക് ഗോപി സുന്ദറാണ് ഈണം പകര്ന്നിരിക്കുന്നത്.
ഹാപ്പിംഗ് വെഡ്ഡിംഗ്, ചങ്ക്സ്, അഡാര് ലവ് എന്നീ ചിത്രങ്ങള്ക്ക് ശേഷം ഒമര് ലുലു സംവിധാനം ചെയ്യുന്ന ചിത്രമാണ് “ധമാക്ക”. ഒളിമ്പ്യന് അന്തോണി ആദത്തിലൂടെ ബാലതാരമായി അരങ്ങേറ്റം കുറിച്ച ടോണി ഐസക് എന്ന കഥാപാത്രമായി എല്ലാവരെയും വിസ്മയിപ്പിച്ച അരുണ് ആണ് ധമാക്കയിലെ നായകന്. നിക്കി ഗല്റാണിയാണ് നായിക. സലിം കുമാര്, ഇന്നസെന്റ്, സാബുമോന്, മുകേഷ്, ഉര്വ്വശി, നേഹ, ഹരീഷ് കണാരന്, ധര്മജന് ബോള്ഗാട്ടി, ഷാലിന് സോയ തുടങ്ങി വന്താരനിരയാണ് ചിത്രത്തില് അണിനിരക്കുന്നത്.
ഗുഡ് ലൈന് പ്രൊഡക്ഷന്സ് അവതരിപ്പിക്കുന്ന ധമാക്ക എം കെ നാസര് ആണ് നിര്മ്മിക്കുന്നത്. സാരംഗ് ജയപ്രകാഷ്, വേണു ഓവി കിരണ് ലാല് എന്നിവര് ചേര്ന്നാണ് തിരക്കഥയും സംഭാഷണവും ഒരുക്കുന്നത്. ഡിസംബര് 20 ന് ചിത്രം തിയേറ്ററുകളിലെത്തും.
