പഠാനിലെ സല്മാന് ഖാന്റെ കാമിയോ അപ്പിയറന്സ് വളരെ ശ്രദ്ധിക്കപ്പെട്ടിരുന്നു. അവസാനം നല്കിയ ക്രെഡിറ്റ്സില് യഷ് രാജ് ഫിലിംസ് സ്പൈ യൂണിവേഴ്സില് ഇരുവരും ഒന്നിക്കുമെന്ന സൂചനയുണ്ട്. റിപ്പോര്ട്ടുകള് പ്രകാരം സല്മാന് – കത്രീന കൈഫ് ചിത്രം ‘ടൈഗര് 3’ല് ഷാരൂഖ് ഖാന് ഉടനെ ചേരും.
ഏപ്രില് അവസാനത്തോടെ നടന് ചിത്രത്തിനൊപ്പം ചേരുമെന്നാണ് റിപ്പോര്ട്ട്. താന് ഒരു പ്രധാന ദൗത്യത്തിന് പോകുകയാണെന്നും അതിനിടെ പഠാന് ടൈഗറിനെ കാണുമെന്നും സല്മാന് ‘പഠാനി’ല് ഷാരൂഖിനോട് പറയുന്നുണ്ട്.
ദീപിക പദുക്കോണ് ടൈഗര് 3ല് കാമിയോ റോളില് എത്തുമെന്നും അഭ്യൂഹങ്ങള് ഉണ്ട്. ഒരു പാകിസ്താനി ഇന്റലിജന്സ് ഓഫീസര് ആണ് പഠാനില് ദീപികയുടെ കഥാപാത്രം. അതേസമയം പകിസ്താനി സ്പൈ ആണ് ടൈഗര് ഫ്രാഞ്ചൈസിയില് കത്രീന കൈഫ്.
മനീഷ് ശര്മ്മയാണ് ജനപ്രിയ ഫ്രാഞ്ചൈസിയുടെ മൂന്നാം ഭാഗത്തിന്റെ സംവിധായകന് ‘ഏക് താ ടൈഗര്’ കബീര് ഖാന് സംവിധാനം ചെയ്തപ്പോള് ‘ടൈഗര് സിന്ദാ ഹേ’യ്ക്ക് അലി അബ്ബാസ് സഫര് ആണ് സംവിധായകനായത്. ഏപ്രില് അവസാനം ഷാരൂഖ് ചിത്രത്തില് ചേരുമ്പോള് മുംബൈ ആയിരിക്കും ലൊക്കേഷന് എന്ന് പ്രൊജക്റ്റുമായി അടുത്ത വൃത്തങ്ങള് റിപ്പോര്ട്ട് ചെയ്യുന്നു.
ഈ വര്ഷം ദീവാലി റിലീസ് ആണ് ചിത്രത്തിന്. ‘കരണ് അര്ജുന്’, ‘കുച്ച് കുച്ച് ഹോതാ ഹേ’, ‘ഹം തുംഹാരേ ഹേ സനം’ എന്നിവയാണ് പഠാന് പുറമെ ഷാരൂഖും സല്മാനും ഒന്നിച്ച ചിത്രങ്ങള്. ആറ്റ്ലിയുടെ സംവിധാനത്തില് ആക്ഷന് ത്രില്ലര് ചിത്രം ‘ജവാനും’ രാജ്കുമാര് ഹിരാനിയുടെ ‘ഡങ്കി’യുമാണ് വരാനിരിക്കുന്ന ഷാരൂഖ് ചിത്രങ്ങള്.