ഇന്ത്യൻ സിനിമയിൽ സമീപകാലത്തിറങ്ങിയ ഏറ്റവും സാമ്പത്തിക വിജയം നേടിയ ചിത്രങ്ങളിലൊന്നായിരുന്നു സിദ്ധാര്ഥ് ആനന്ദ് സംവിധാനം ചെയ്ത് ഷാരൂഖ് ഖാൻ നായകനായെത്തിയ ‘പഠാൻ’ എന്ന സിനിമ. പഠാന് ശേഷം സിദ്ധാർത്ഥ് ആനന്ദ് സംവിധാനം ചെയ്ത് ഹൃത്വിക് റോഷനും ദീപിക പദുകോണും പ്രധാന വേഷത്തിലെത്തുന്ന ‘ഫൈറ്റർ’ എന്ന ചിത്രത്തിന് വലിയ പ്രതീക്ഷയോടെയാണ് സിനിമലോകം നോക്കികാണുന്നത്.
ചിത്രത്തിന്റെ ടീസറും വലിയ രീതിയിലാണ് സിനിമലോകം ഏറ്റെടുത്തത്. അതുകൊണ്ട് തന്നെ പഠാന് ശേഷം മികച്ചൊരു ദൃശ്യനുഭവമായിരിക്കും ഫൈറ്റർ എന്നാണ് പ്രേക്ഷകർ പ്രതീക്ഷിക്കുന്നത്. എന്നാൽ ടീസർ പുറത്തിറങ്ങിയതോടെ നടി ദീപിക പദുകോണിനെതിരെ സൈബർ ആക്രമണവുമായി രംഗത്തെത്തിയിരിക്കുകയാണ് സദാചാര സമൂഹം.
വ്യോമസേന പൈലറ്റുമാരുടെ വേഷത്തിലാണ് ചിത്രത്തിൽ ഹൃത്വിക് റോഷനും ദീപികയുമെത്തുന്നത്. ബീച്ചിൽ വെച്ചുള്ള രണ്ടുപേരുടെയും ഇന്റിമേറ്റ് രംഗത്തെയും ദീപികയുടെ വസ്ത്രത്തെയും അപമാനിച്ചുകൊണ്ടാണ് സൈബർ ആക്രമണം നടക്കുന്നത്.
ഈ രംഗത്തിൽ ദീപിക ബിക്കിനിയാണ് ധരിച്ചിരിക്കുന്നത്. ഇവൾക്ക് എപ്പോഴും ഇതുതന്നെയാണോ വേഷം, ഏത് വ്യോമസേന പൈലറ്റ് ആണ് പൊതുസ്ഥലത്ത് ബിക്കിനി ധരിക്കുന്നത്, ഇത് വ്യോമസേനയെ അപമാനിക്കുന്നതിന് തുല്യമാണ്… ഇങ്ങനെപോവുന്നു കമന്റുകളും പോസ്റ്റുകളും.
ദീപികയ്ക്ക് പോണ് ഇന്ഡസ്ട്രിയിലേക്ക് പൊയ്ക്കൂടേ എന്നുവരെ അധിക്ഷേപിക്കുന്നുണ്ട്. നേരത്തെ പഠാനിലെ ഗാനരംഗം ഇറങ്ങിയ സമയത്തും നായികയായ ദീപികയ്ക്കെതിരെ സൈബര് ആക്രമണം ഉണ്ടായിരുന്നു. ഗാനരംഗത്തില് ദീപിക ധരിച്ച കാവി നിറത്തിലുള്ള ബിക്കിനി കണ്ടാണ് ചിലർക്ക് കുരു പൊട്ടിയത്.
എന്നാൽ ഇത്തരം കുരുപൊട്ടലുകൾ കാരണം സിനിമയ്ക്ക് ഗുണമുണ്ടാവും എന്നാണ് ഒരു വിഭാഗം പ്രേക്ഷകർ പറയുന്നത്.നേരത്തെ കാവി ബിക്കിനി പ്രശ്നവുമായി എത്തിയപ്പോൾ 1000 കോടി കളക്ഷൻ നേടി റെക്കോർഡുകൾ സൃഷ്ടിച്ച സിനിമയാണ് പഠാൻ. 2024 ജനുവരി 25 നാണ് ഫൈറ്റർ വേൾഡ് വൈഡ് റിലീസ്. ചിത്രത്തിന് വേണ്ടി പ്രതീക്ഷയോടെ കാത്തിരിപ്പിലാണ് സിനിമലോകം.