ആരാധകർ ഏറെ ആകാംഷയോടെ കാത്തിരിക്കുന്ന ലോകേഷ് കനകരാജ് ചിത്രമാണ് ‘കൂലി’. വമ്പൻ ബജറ്റിൽ ഒരുങ്ങുന്ന ആക്ഷൻ ചിത്രത്തിന്റെ ഓരോ അപ്‌ഡേറ്റുകൾക്കും വേണ്ടി ആവേശത്തോടെയാണ് ഏവരും കാത്തിരിക്കാറുള്ളത്. കൂലി ടീം പുറത്തുവിട്ട സ്റ്റില്ലുകളാണ് ഇപ്പോൾ സോഷ്യൽ മീഡിയയിൽ വൈറലാകുന്നത്.
ചിത്രത്തിൽ നിന്നുള്ള പവർഹൗസ് വൈബ് എന്ന ഗാനത്തിന്റെ പുതിയ വേർഷനൊപ്പം ചിത്രത്തിന്റെ മേക്കിങ് വീഡിയോയും അണിയറപ്രവർത്തകർ കഴിഞ്ഞ ദിവസം പങ്കുവെച്ചിരുന്നു. ഇതിൽ നിന്നുള്ള രജനിയുടെ സ്റ്റില്ലുകളാണ് ശ്രദ്ധ നേടുന്നത്. രജനിയുടെ ആക്ഷൻ സീനുകളാണ് പ്രധാനമായും വിഡിയോയിൽ ഉള്ളത്.
ഇൻഡസ്ട്രി ഹിറ്റ് ഉറപ്പിച്ചോളൂ, സിനിമ ബോക്സ് ഓഫീസിൽ നിന്നും 1000 കോടി നേടും, ഒരേയൊരു രജനി എന്നൊക്കെയുള്ള നിരവധി കമന്റുകളാണ് വീഡിയോയ്ക്ക് വന്നുകൊണ്ടിരിക്കുന്നത്.
മാനഗരം, കൈതി, മാസ്റ്റർ, വിക്രം, ലിയോ എന്നീ സിനിമകൾക്ക് ശേഷം ലോകേഷ് സംവിധാനം ചെയ്യുന്ന ചിത്രമാണ് കൂലി. സൺ പിക്ചേഴ്സിന്റെ ബാനറിൽ കലാനിധി മാരനാണ് ചിത്രം നിർമിക്കുന്നത്. ഓഗസ്റ്റ് 14ന് ആണ് ചിത്രം റിലീസ് ചെയ്യുന്നത്.
നാഗാർജുന അക്കിനേനി, ഉപേന്ദ്ര, സത്യരാജ്, സൗബിൻ ഷാഹിർ, ശ്രുതി ഹാസൻ, റീബ മോണിക്ക ജോൺ എന്നിവരാണ് ചിത്രത്തിൽ പ്രധാന കഥാപാത്രങ്ങളെ അവതരിപ്പിക്കുന്നത്. അനിരുദ്ധ് രവിചന്ദർ ആണ് കൂലിയുടെ സംഗീത സംവിധാനം.
